V ФОРУМ РЭГІЁНАЎ БЕЛАРУСІ І РАСІІ

Магілёў. 10-12 кастрычніка 2018 года.

Рус Бел Eng 中文

Прамысловасць

Магілёўская вобласць з’яўляецца адным з самых развітых рэгіёнаў Рэспублікі Беларусь. Яна валодае магутным прамысловым і сельскагаспадарчым патэнцыялам, адрозніваецца выгадным геаграфічным становішчам. Асноўнай галіной гаспадаркі рэгіёна застаецца прамысловасць, доля якой у аб’ёме агульнарэспубліканскай прампрадукцыі складае каля 9%.

Усяго на Магілёўшчыне вытворчасцю прамысловай прадукцыі займаюцца больш за 1200 прадпрыемстваў з агульнай колькасцю працуючых больш за 100 тысяч чалавек, або каля 30% ад агульнай колькасці занятых у эканоміцы вобласці. Сярод рэгіёнаў рэспублікі Магілёўская вобласць застаецца галоўным вытворцам хімічных валокнаў, цэменту, цэглы і будаўнічых блокаў, жалезабетонных шпал, тканін. У ёй засяроджаны рэспубліканскі аб’ём вытворчасці ліфтаў і шын аўтамабільных і сельскагаспадарчых машын, у прамысловым сектары рэгіёна вырабляецца каля 20% рэспубліканскага аб’ёму труб, больш за 30% – паперы і кардона, плодаагароднінных кансерваў, каля 25% – кандытарскіх вырабаў з шакаладу і цукру, амаль 15% – мукі, натуральнамалочнай прадукцыі.

Пачынаючы з 2016 года адзначаецца станоўчая дынаміка росту аб’ёмаў прамысловай вытворчасці – з 101,3% ў 2016 годзе да 105,2% у студзені – красавіку 2018 года. Пры гэтым не дапускаецца рост звышнарматыўных складскіх запасаў. Рэнтабельнасць продажу ў прамысловых арганізацыях складае 5,4%.

За апошнія пяць гадоў у вобласць паступіла каля 1,5 мільярда даляраў ЗША замежных інвестыцый, з іх больш за 970 мільёнаў – прамыя інвестыцыі. Геаграфія іх шырокая, найбольшыя аб’ёмы прыпадаюць на Расійскую Федэрацыю, Нідэрланды, Літву, Латвію, Турцыю, Германію і Кіпр.

Аб’ём прамых замежных інвестыцый на чыстай аснове па выніках 2017 года склаў 100 мільёнаў долараў ЗША пры гадавым заданні 95 мільёнаў даляраў. У цэлым за апошнія пяць гадоў паступленне ў рэгіён такіх інвестыцый перавысіла 534,5 мільёнаў долараў ЗША.

Прамысловы комплекс Магілёўскай вобласці накіраваны на захаванне наяўнага і далейшае павелічэнне вытворча-тэхнічнага патэнцыялу, захаванне працоўных месцаў, павышэнне якасці і канкурэнтаздольнасці прадукцыі. У спісе найбуйнейшых прадпрыемстваў Магілёўскай вобласці са шматгадовай гісторыяй – ААТ «Магілёўхімвалакно», якое ў год 80-годдзя вобласці будзе адзначаць 50 гадоў з дня атрымання першага савецкага лаўсана, ААТ «Белшына» – прадпрыемства ажыццяўляе экспартна-імпартныя аперацыі больш чым з 75 краінамі свету, паспяхова асвойваюць новыя рынкі збыту ААТ «Чырвоны харчавік», «Магатэкс», холдынг «Магілёўская малочная кампанія «Бабушкина крынка», магілёўская абутковая фабрыка Shagovita, ААТ «Магілёўліфтмаш», «Стужка», СЗАТ «Сервалюкс», ААТ «Кіруючая кампанія холдынгу «Бабруйскаграмаш»» і «Бабруйскі завод трактарных дэталяў і агрэгатаў», СТАА «Джакей пластык», ААТ «ФанДАК», «Завод газетнай паперы» і іншыя.

Падкатэгорыі: