Рус Бел Eng 中文

Адукацыя

Адукацыйны працэс у Магілёўскай вобласці забяспечвае 23 тыс. педагагічных работнікаў, 76,2% з ліку якіх – настаўнікі з вышэйшай і першай кваліфікацыйнымі катэгорыямі. Гэта каманда прафесіяналаў, якія валодаюць сучаснымі інфармацыйна-камунікацыйнымі тэхналогіямі і здольныя прывіць падрастаючаму пакаленню любоў да ведаў. З пастаўленай задачай нашы педагогі спраўляюцца даволі паспяхова. У 2017 годзе 31% выпускнікоў сярэдняй школы меў сярэдні бал атэстата больш за 8,5. Атэстаты асаблівага ўзору з узнагароджаннем залатым або сярэбраным медалём атрымаў 301 выпускнік 11 класаў. Працэнт паступлення выпускнікоў у ВНУ ў апошнія гады стабільны і складае 58-60%. Больш за тое, каб дапамагчы «заўтрашнім» выпускнікам вызначыцца з выбарам прафесіі, ва ўстановах адукацыі рэалізуецца профільнае навучанне.

У цэлым сёння сістэма адукацыі рэгіёна ўключае: 343 ўстановы дашкольнай адукацыі; 350 устаноў агульнай сярэдняй адукацыі; 33 установы спецыяльнай адукацыі; 41 установу дадатковай адукацыі дзяцей і моладзі; 18 устаноў прафесійна-тэхнічнай адукацыі; 20 устаноў сярэдняй спецыяльнай адукацыі; 7 устаноў вышэйшай адукацыі (у тым ліку 2 філіялы).

Па выніках рэспубліканскіх алімпіяд па вучэбных прадметах у 2017 годзе ўдзельнікамі каманды Магілёўскай вобласці атрымана 80 дыпломаў. Бяруць нашы школьнікі і міжнародныя вышыні. У мінулым годзе яны заваявалі 7 медалёў на міжнародных алімпіядах (хімія, матэматыка, геаграфія, фізіка, інфарматыка). Таксама апошнія пяць гадоў рэгіён упэўнена ўваходзіць у лік лідараў у камандным заліку па выніках алімпіяды школьнікаў Саюзнай дзяржавы.

Складана сабе ўявіць «педагагічную сістэму» вобласці без аднаго з яе элементаў – прафесійна-тэхнічнай адукацыі. У цяперашні час яна перажывае змены. Адбываецца ўзбуйненне ўстаноў сярэдняй спецыяльнай адукацыі за кошт далучэння да іх устаноў прафесійна-тэхнічнай адукацыі. Усяго ў вобласці ў 2017 годзе прайшла рэарганізацыя 7 устаноў прафесійнай адукацыі. Улічваючы перспектыўную патрэбу ў кадрах, а таксама тэндэнцыі ў развіцці эканомікі, адкрываюцца новыя спецыяльнасці. Так, ажыццёўлены прыём па спецыяльнасцях: «Канструяванне і тэхналогія швейных вырабаў» у Бабруйскім дзяржаўным тэхналагічным каледжы, «Арганізацыя працы сялянскіх (фермерскіх) гаспадарак» у Крычаўскім дзяржаўным прафесійным агратэхнічным каледжы, «Мехатроніка» і «Тэхналогія харчовых вытворчасцяў» у Магілёўскім дзяржаўным тэхналагічным каледжы.

У 2017 годзе на будаўніцтва ўстаноў адукацыі вобласці было накіравана Br25,9 млн., на капітальны і бягучы рамонт – Br12,4 млн. Завершана будаўніцтва сярэдняй школы №8 у Крычаве, урачыстае адкрыццё якой адбылося 1 верасня 2017 года. У магілёўскім мікрараёне Казіміраўка з’явіўся новы дзіцячы сад на 240 месцаў. Працягваецца будаўніцтва сярэдняй школы ў бабруйскім мікрараёне Заходні.

 

 

 

 

Падкатэгорыі: