Знешнеэканамічны сектар Магілёўскай вобласці сёння з’яўляецца дынамічным звяном гаспадарчага механізму. Штогод больш за палову ўсёй вырабленай у рэгіёне прадукцыі пастаўляецца на экспарт, а ў сферу знешнеэканамічнай дзейнасці ўключаецца ўсё больш суб’ектаў гаспадарання. Магілёўская вобласць падтрымлівае гандлёвыя адносіны па выніках 2019 года са 114 дзяржавамі свету. Прадукцыя арганізацый вобласці экспартуецца ў 100 краін. Асноўнымі знешнегандлёвымі партнёрамі вобласці з’яўляюцца Расія, Украіна, Германія, Польшча, Казахстан, Кітай, Літва, Турцыя, Нідэрланды і іншыя. У апошнія гады ўдаецца не толькі ўтрымліваць пазіцыі прысутнасці на рынках шэрагу замежных дзяржаў, але і пачаць пастаўкі ў такія краіны, як Ангола, Аргенціна, Бенін, Буркіна-Фасо, Гана, Ісландыя, Іарданія, Камерун, Кот-д’Івуар, Лівія, Малайзія, Марока, Нігер, Тайвань. Адзначана ўстойлівая тэндэнцыя росту экспартных паставак тавараў як у краіны СНД, так і ў краіны далёкага замежжа.

Таварная структура экспартных паставак Магілёўскай вобласці на працягу многіх гадоў прадстаўлена наступнымі арганізацыямі і іх таварамі: у хімічнай галіне: ААТ «Белшына»– адно з найбуйнейшых прадпрыемстваў Еўропы па выпуску шын, ААТ «Магілёўхімвалакно» – вядучы вытворца поліэфірнай прадукцыі; у машынабудаванні і прыборабудаванні: ААТ «Бабруйскі завод трактарных дэталяў і агрэгатаў» – трактары і запасныя часткі да іх, ААТ «Кіруючая кампанія холдынгу “Бабруйскаграмаш”» – сельскагаспадарчая тэхніка, ААТ «Завод «Электрарухавік”» – электрарухавікі, ААТ «Магілёўскі металургічны завод» – трубы сталёвыя і г.д.; у лёгкай прамысловасці: ААТ «Магатэкс» – больш за 60 найменняў тканін, ААТ «Стужка»–стужкаткацкая, цюлегардзінная і пляцельная прадукцыя, ЗАТ «Легпрамразвіццё» – пашыў спецадзення, нарыхтоўка вырабаў з пластмас і г.д.; у харчовай прамысловасці: ААТ «Бабушкина крынка», ААТ «Малочныя горкі» – малочная прадукцыя, сыры, тварог, ёгурты, ААТ «Магілёўскі мясакамбінат», ААТ «Бабруйскі мясакамбінат» – ялавічына, каўбасныя і мясныя вырабы, тлушч харчовы, ААТ «Мажэліт» – жэлацін і клей касцяны, ААТ «Чырвоны харчавік» – кандытарскія вырабы, ААТ «Булачна-кандытарская кампанія “Дамачай”» – хлебабулачныя вырабы і г.д. У Кітай пастаўляюцца ялавічына, мяса птушкі, лён, малочная прадукцыя, лесаматэрыялы. Па выніках 2019 года асноўную долю ў сферы паслуг складаюць транспартныя паслугі, будаўнічыя і турыстычныя.