Ужо ў продажы квіткі на галоўную падзею гэтага лета - фестываль «Александрыя збірае сяброў».
У гэтым годзе фестываль пройдзе 6 ліпеня на сваім звыклым месцы - маляўнічым беразе Дняпра. Каля маста, які злучае аграгарадкі Александрыя і Копысь.
Рэспубліканскае свята «Купалле» («Александрыя збірае сяброў») - адзіная ў сваім родзе яркая культурная падзея лета для Прыдняпроўя.
Традыцыйна кожны год вядзецца работа па падрыхтоўцы да свята, праводзяцца прэс-канферэнцыі, нарады, дзе абмяркоўваюцца вынікі мінулагодняга фестывалю, прапрацоўваецца праграма сёлетняга свята.
Сваю гісторыю «Купалле», як маштабны фэст, пачынае з 2010 года на Магілёўскай зямлі, у Александрыі, на радзіме Прэзідэнта Рэспублікі Беларусь Аляксандра Рыгоравіча Лукашэнкі. 6-7 ліпеня на мерапрыемства з'ехаліся госці з навакольных сёл, вёсак, а таксама з Оршы, Шклова, Магілёва і Мінска. Гледачам была прадстаўлена канцэртная праграма «Купалле над Дняпром». Свята наведаў кіраўнік дзяржавы і, пасля знаёмства з фестывальнымі падворкамі, адзначыў, што прыемна здзіўлены ўвазе да свята. Яго штогадовая прысутнасць і прывітальнае слова на свяце стала добрай традыцыяй.
Ідэя праводзіць гулянне менавіта ў Александрыі ўзнікла не выпадкова. Усе купальскія мерапрыемствы традыцыйна праходзілі на беразе ракі Дняпро, рэчышча якой спрадвеку служыла калыскай культуры многіх славянскіх народаў, а водная артэрыя калісьці была неад'емнай часткай вялікага гандлёвага шляху «з варагаў у грэкі».
Падрабязная інфармацыя аб свяце тут: kupalle.by
