Пытанне: з якой даты мае права на пенсію з нагоды страты карміцеля дзіця, у дачыненні да якога быў устаноўлены факт бацькоўства ў судовым парадку пасля смерці бацькі. Ці будзе мець права на пенсію з нагоды страты карміцеля маці дзіцяці, якаяне знаходзілася ў шлюбе з бацькам дзіцяці і знаходзіцца ў адпачынку па доглядзе дзіцяці да дасягнення ім узросту 3 гадоў.
Адказ: згодна з часткай чацвёртай артыкула 50 Кодэкса Рэспублікі Беларусь аб шлюбе і сям’і ўзаемныя правы і абавязкі паміж бацькам і дзіцём, калі бацька і маці дзіцяці не знаходзяцца ў шлюбе, узнікаюць з моманту ўнясення ва ўстаноўленым парадку звестак аб ім як бацьку ў запіс акта аб нараджэнні дзіцяці або з моманту ўступлення ў законную сілу рашэння суда аб устанаўленні бацькоўства. Такім чынам, Кодэксам урэгуляваны момант ўзнікнення бацькоўскіх правоў і абавязкаў у выпадку ўстанаўлення бацькоўства ў судовым парадку.
З улікам адзначанага, днём узнікнення права на пенсію з нагоды страты карміцеля варта разглядаць дату ўступлення ў сілу рашэння суда аб устанаўленні бацькоўства.
На падставе пункта «в» артыкула 35 Закона Рэспублікі Беларусь «Аб пенсійным забеспячэнні» ў кола членаў сям’і памерлага карміцеля, якія маюць права на пенсію з нагоды страты карміцеля, уключаны непрацоўны муж (жонка), заняты (занятая) доглядам дзяцей памерлага карміцеля, якія не дасягнулі 8 гадоў.
Такім чынам, маці дзіцяці права на пенсію з нагоды страты карміцеля мець не будзе, паколькі не знаходзілася ў зарэгістраваным шлюбе з памерлым карміцелем.
