Навагодняя дабрачынная акцыя «Нашы дзеці» праходзіць у краіне з 9 снежня 2019 года па 10 студзеня 2020 года.Кіраўнікі рэспубліканскіх органаў дзяржкіравання, мясцовых выканаўчых і распарадчых органаў наведваюць дзіцячыя інтэрнатныя ўстановы і дамы сямейнага тыпу, апякунскія і прыёмныя сем’і, сем’і, якія выхоўваюць дзяцей-інвалідаў, цэнтры карэкцыйна-развіваючага навучання і рэабілітацыі, бальніцы. Яны віншуюць дзяцей з Новым годам і Калядамі, уручаюць падарункі, дапамагаюць у вырашэнні праблем. Да дабрачыннай акцыі таксама далучаюцца грамадскія аб’яднанні.
У навагодніх мерапрыемствах рэспубліканскай дабрачыннай акцыі «Нашы дзеці» прыме ўдзел каля 150 тыс. юных жыхароў Магілёўскай вобласці. Да 10 студзеня прадстаўнікі выканаўчай улады рэгіёна з падарункамі і віншаваннямі наведаюць 50 дзіцячых дамоў сямейнага тыпу, 23 цэнтры карэкцыйна-развіваючага навучання і рэабілітацыі, 7 дзіцячых сацыяльных прытулкаў, 10 устаноў інтэрнатнага тыпу абласнога падпарадкавання.
Абласная губернатарская ёлка ў Магілёве адбудзецца 27 снежня ў Палацы культуры вобласці. Яна збярэ каля 600 дзяцей з усяго рэгіёна, у ліку якіх выдатнікі вучобы, пераможцы раённых і абласных алімпіяд, дзеці-сіроты і дзеці, якія засталіся без апекі бацькоў, а таксама лідары і актывісты дзіцячых грамадскіх арганізацый.
Дзеці прымуць удзел у тэатралізаваным прадстаўленні каля ёлкі, атрымаюць салодкія падарункі і ўбачаць навагоднюю музычную казку «Чароўны пераплёт», галоўным героем якой стане 10-гадовы хлопчык Воўка Піджакоў. Па сюжэце Дзед Мароз вырасціў чароўную елку з кнігамі, а злы чараўнік Шырлін-Мырлін і ведзьма Рампумпель Гадзюкіна спрабуюць іх выкрасці. На дапамогу прыходзіць Воўка: ратуючы кнігі, ён трапляе ў кніжнае царства і сустракае розных літаратурных персанажаў – Снежную Каралеву, Змея Гарыныча, Дон Кіхота і Санча Панса, Айбаліта, Бармалея і многіх іншых.
«Чароўны пераплёт» – гэта гісторыя пра дабро, узаемадапамогу і сапраўднае сяброўства. За час навагодніх і калядных святаў – з 21 па 30 снежня, а таксама з 4 па 5 студзеня казку ўбачаць каля 30 тыс. дзяцей і іх бацькоў.
НАВІНАВЫЯ МАТЭРЫЯЛЫ ПА ТЭМЕ
Навагодні баль для адораных і таленавітых дзяцей прайшоў у Бабруйску
Свята для анкахворых дзяцей зладзілі ў Магілёве
Навагодні баль для адораных дзяцей пройдзе ў Бабруйску 14 снежня
Першы абласны навагодні баль для адоранай моладзі пройдзе ў Магілёве 16 снежня
Калядны кадэцкі баль пройдзе 18 снежня ў Магілёве
