Пытанне: Ці можна па пагадненні бакоў (паміж работнікам і наймальнікам дасягнута дамоўленасць аб выплаце адпускных разам з выплатай заработнай платы) зрабіць выплату адпускных пасля прадастаўлення адпачынку?
АДКАЗ: Працоўны адпачынак прадастаўляецца за працу на працягу працоўнага года (штогод) з захаваннем ранейшай працы і сярэдняга заробку.
Артыкулам 176 Працоўнага кодэкса Рэспублікі Беларусь (далей – ПК) вызначана, што наймальнік абавязаны выплаціць сярэдні заробак за час працоўнага адпачынку не пазней чым за 2 дні да пачатку адпачынку.
Такім чынам, указаная норма прадугледжвае папярэднюю, да пачатку адпачынку, выплату сярэдняга заробку, які захоўваецца за час працоўнага адпачынку, накіраваная на захаванне інтарэсаў работніка і з’яўляецца абавязкам наймальніка. У выпадку яе невыканання ў работніка ёсць права патрабаваць пераносу адпачынку ў адпаведнасці з пунктам 5 часткі першай артыкула 171 ПК.
Пры гэтым варта адзначыць, што нясвоечасовая выплата сярэдняга заробку за час працоўнага адпачынку з’яўляецца парушэннем заканадаўства аб працы ў частцы невыканання тэрмінаў выплаты заработнай платы.
У адпаведнасці з нормамі артыкула 9.19 кодэкса Рэспублікі Беларусь аб адміністрацыйных правапарушэннях парушэнне наймальнікам або ўпаўнаважанай службовай асобай наймальніка парадку і тэрмінаў выплаты заработнай платы цягне накладанне штрафу ў памеры ад чатырох да дваццаці базавых велічынь, а на юрыдычную асобу – да ста базавых велічынь.
