Дырэктар ААТ «Рассвет імя К.П.Арлоўскага», старшыня Магілёўскага абласнога аграпрамысловага саюза, дэпутат Кіраўскага раённага Савета дэпутатаў Аляксандр Багель абраны дэлегатам VI Усебеларускага народнага сходу. На прадстаўнічы форум ён накіруецца ў трэці раз – дагэтуль прымаў удзел у рабоце IV і V сходаў. І на справе пераканаўся, што гэта сапраўды дзейная форма народаўладдзя. Абмеркаваныя і вызначаныя на іх арыенціры рэальныя для дасягнення, падкрэсліў Аляксандр Іванавіч. У прыватнасці, напрамкі развіцця сельскагаспадарчай галіны, прапісаныя ў папярэдніх пяцігадовых праграмах, рэалізаваны ў «Рассвеце», што пацвярджае і яго цяперашняя эканамічная і фінансавая стабільнасць.
Але не ў характары рассветаўцаў спыняцца на дасягнутым: кіраўнік і калектыў бачаць перспектывы развіцця і ставяць новыя задачы па павелічэнні вытворчасці сельскагаспадарчай прадукцыі, паляпшэнні яе якасці, павышэнні эканамічнай эфектыўнасці сельгасвытворчасці, зніжэнні затрат, а ў выніку – росту дабрабыту працаўнікоў.
Аляксандр Багель упэўнены, што пра гэтыя напрамкі ў маштабах рэспублікі будзе ісці размова на VI Усебеларускім народным сходзе ў ліку іншых пытанняў развіцця аграпрамысловага комплексу. Дэпутат лічыць, што гэты форум будзе асаблівым, насычаным рознымі тэмамі і прапановамі.
– Лічбы, прыведзеныя ў Асноўных палажэннях праекта Праграмы развіцця рэспублікі на новую пяцігодку, – адзначыў Аляксандр Багель, – абгрунтаваныя, і правільна, што ставяцца такія высокія задачы. На аснове ўкаранення навейшых дасягненняў навукі, перадавога вопыту, забеспячэння дыктатуры тэхналогій яны вырашальныя.
Увогуле ў сельгасвытворчасці можна выбіраць, у якім сегменце працаваць: займацца буйнатаварнай гаспадаркай ці, напрыклад, фермерам стаць. Ёсць карысны вопыт, талковыя людзі, якія ў стане ўзяцца і арганізаваць усё належным чынам, – магчымасці ў краіне створаны.
Бягучы год для Аляксандра Багеля па-свойму адметны – у лістападзе споўніцца дзесяць год, як ён узначаліў працоўны калектыў буйнейшай у раёне і на Магілёўшчыне сельгасарганізацыі – СВК «Рассвет» імя К.П.Арлоўскага (зараз ААТ «Рассвет імя К.П.Арлоўскага»). Ён – пяты па ліку кіраўнік у гісторыі знакамітай гаспадаркі. Прыйшоў сюды, маючы за плячыма шмат год работы ў АПК, у тым ліку ў нашым раёне. Гэта вопытны, граматны, адказны кіраўнік, які прыслухоўваецца да патрэб людзей, дае ім сябе праявіць.
Шануючы слаўныя традыцыі, прымнажаючы дасягненні, пераадольваючы складанасці, «Рассвет» крочыць наперад, праслаўляючы наш раён і вобласць на ўзроўні рэспублікі. У 2018 годзе за значны ўклад у развіццё сельскагаспадарчай галіны, дасягненне высокіх вытворчых паказчыкаў калектыў гаспадаркі быў удастоены Падзякі Прэзідэнта Рэспублікі Беларусь.
За шматгадовую добрасумленную працу, высокі прафесіяналізм, узорнае выкананне службовых абавязкаў, вялікі асабісты ўклад у развіццё аграпрамысловага комплексу Аляксандр Багель узнагароджаны медалём «За працоўныя заслугі».
Мы пацікавіліся ў Аляксандра Іванавіча, азіраючыся на пройдзены з рассветаўцамі амаль 10-гадовы шлях, якія б ён адзначыў дасягненні.
– Безумоўна, галоўнае, што ў нас захаваўся калектыў – працавітых, адказных, добрасумленных людзей, выхаваных на традыцыях ранейшых пакаленняў рассветаўцаў, стаўленні да працы, закладзеным Героем Савецкага Саюза, Героем Сацыялістычнай Працы Кірылам Пракопавічам Арлоўскім.
У нас склалася зладжаная каманда кіраўніцтва і спецыялістаў. У ходзе работы зразумеў, наколькі гэта важна, улічваючы, што «Рассвет» – шматгаліновая гаспадарка: і дакладная арганізацыя працы на кожным участку, у падраздзяленнях заўжды пад кантролем. Галоўныя мае памочнікі – людзі адказныя, выдатна выконваючыя свае функцыі: гэта першы намеснік дырэктара Аляксандр Жылінскі, кіраўнікі рыбнай гаспадаркі Алег Шапавалаў і ўчастка «Сад» Алена Юркавец, намеснік дырэктара па жывёлагадоўлі Іна Бяляўская і іншыя. Стараюцца і маладыя кадры: напрыклад, загадчык аўтагаража Яўген Зайцаў – перспектыўны спецыяліст.
У лік нашых дасягненняў уключаю будаўніцтва сучасных аб’ектаў. У 2012 годзе ўвайшла ў строй буйнейшая ў Беларусі біягазавая ўстаноўка вытворчай магутнасцю 4,8 Мвт электраэнергіі. У прыярытэце ў нас – развіццё жывёлагадоўчай галіны. У свой час, згодна адпаведнага Указа Прэзідэнта, быў узведзены МТК «Валосавічы».
У 2019 годзе завяршылі будаўніцтва новай МТФ «Мышкавічы» высокага сучаснага ўзроўню. З’явіліся іншыя жывёлагадоўчыя аб’екты і памяшканні, у якія ўкладзены ўласныя інвестыцыі. Можна таксама нагадаць ачышчальна-сушыльны комплекс, агароднінасховішча. Будавалі жылыя дамы для рассветаўцаў.
На стале ў рабочым кабінеце Аляксандра Іванавіча заўжды ляжыць ліст з табліцамі па аб’ёмах вытворчасці малака і атрыманай ад рэалізацыі выручкі з таго часу, як ён стаў кіраўніком «Рассвета». Па словах дырэктара, гэта для таго, каб адсочваць дынаміку ў важнай для гаспадаркі малочнай галіне. І, трэба адзначыць, паказчыкі ў табліцы – з павелічэннем з года ў год. Калі ён прыйшоў у гаспадарку, сярэднясутачны надой на карову быў 6142 кг, па выніках 2020 года перакрочылі 8-тысячны рубеж і дасягнулі паказчыка ў 8132 кг. І па валавым сярэднясутачным надоі палепшылі пазіцыі: раней даілі за суткі максімальна 40-42 тоны, зараз – 62 тоны. Павысілі якасць малака, зараз яно ў асноўным накіроўваецца на перапрацоўку сортам «экстра». А гэта значныя грашовыя паступленні на рахунак гаспадаркі.
Пагалоўе жывёлы зараз складае больш 9 тысяч, яно будзе павялічвацца і далей. Калі Аляксандр Багель прыйшоў на работу ў «Рассвет», пагалоўе дойнага статка ўключала 2200 кароў, сёлета мяркуецца давесці яго да 2600-2700. У планах – будаўніцтва яшчэ аднаго памяшкання на новай ферме.
Ёсць поспехі ў раслінаводстве. У мінулым годзе збожжавыя нядрэнны ўраджай далі: на гэтай зямлі, адзначыў Аляксандр Іванавіч, рэкорды ўжо былі, галоўнае, не дапускаць падзення.
Структура пасяўных плошчаў у асноўным не змянялася, толькі адвялі больш плошчаў пад кукурузу, бо сілас патрэбны як сыравіна для біягазавай устаноўкі.
Рассветаўцы ў галіне раслінаводства мэтанакіравана працуюць у напрамку павышэння ўрадлівасці земляў, граматна ставяцца да селекцыйна-насенняводчага ўдасканалення гатункаў і насення, укараняюць новыя тэхналогіі апрацоўкі сельскагаспадарчых культур.
Галоўнае для развіцця гаспадаркі – рэзультаты фінансавай дзейнасці. Па выніках мінулага года і ў цэлым найбольш прыбытковая прадукцыя – малако, рэнтабельнасць тут склала 40%, работа біягазавай устаноўкі – 36%. Частка электраэнергіі выкарыстоўваецца на свае патрэбы, астатняя рэалізуецца ў сетку «Магілёўэнерга». Нядрэнную рэнтабельнасць атрымалі па вытворчасці бульбы, зерня, цыбулі, а таксама рыбы.
У сельгасарганізацыі, па словах Аляксандра Багеля, надаюць увагу запатрабаванай прадукцыі, якая прыносіць выручку.
Як мы ведаем, працуе ў сельгасарганізацыі цяплічны камбінат, вырошчваюць агародніну закрытага і адкрытага грунту, ёсць яблыневыя сады. Якраз у ліку перспектыўных напрамкаў у праекце Праграмы на новую пяцігодку прапісана пладаводства, а таксама вырошчванне бахчавых і ягадных культур. У «Рассвеце» гэта ўжо апрабавалі. Летась заняліся вырошчваннем кавуноў, атрымалі добры ўраджай, культура стала рэнтабельнай.
У сельскай гаспадарцы, лічыць Аляксандр Багель, можна зарабіць, былі б жаданне, добрасумленныя адносіны да справы і адказнасць. Сярэднямесячная заработная плата ў «Рассвеце» па выніках мінулага года склалася ў памеры 970 рублёў, за снежань – больш 1 тысячы. Даяркі на новай МТФ «Мышкавічы», скотніцы на ферме ў Стаўпішчах, дзе высокія вынікі працы, атрымліваюць ад 1600 да 2-х тысяч рублёў.
Аляксандр Багель з’яўляецца членам прэзідыума раённага Савета дэпутатаў, узначальвае пастаянную камісію па вытворча-эканамічных пытаннях, пытаннях бюджэту і фінансаў.
Дэпутатам раённага Савета дэпутатаў Аляксандр Іванавіч быў абраны па Мышкавіцкай выбарчай акрузе №18.
– Мая дэпутацкая дзейнасць і работа кіраўніка перасякаюцца,– адзначыў Аляксандр Іванавіч, – і межы дзейнасці распаўсюджваюцца не толькі на акругу, але на ўсіх рассветаўцаў, ветэранаў працы, у асноўным у вырашэнні сацыяльных пытанняў. Яны датычацца ўмоў працы, бяспекі, матэрыяльнай падтрымкі. Аказваем дапамогу падшэфным установам адукацыі, а таксама культуры, якія знаходзяцца на тэрыторыі сельсавета. Грамадзянам, якія звяртаюцца асабіста, імкнуся дапамагчы вырашыць праблемы. У нас значны сацыяльны пакет, і ён павялічыўся за апошнія гады. Не шкада грошай на гэтую справу, былі б толькі магчымасці.
Сур’ёзна займаемся навядзеннем парадку на зямлі, дзякуючы чаму ў севазварот гаспадаркі ўводзяцца новыя пасяўныя плошчы. Увага надаецца добраўпарадкаванню тэрыторый. Гэтая работа будзе актыўна працягвацца сёлета, бо ў Мышкавічах плануецца правядзенне раённага свята працаўнікоў вёскі «Дажынкі-2021».
Напрыканцы размовы Аляксандр Багель адзначыў:
– «Рассвет» упэўнена глядзіць у будучыню, дынамічна рухаецца наперад, уносячы свой уклад у забеспячэнне харчовай бяспекі краіны, павышаючы якасць жыцця сяльчан. Планы на 2021 год сельгасарганізацыі даведзены сур’ёзныя, неабходна мэтанакіравана працаваць па іх рэалізацыі, забяспечваючы выкананне тэхналагічнай і працоўнай дысцыпліны. Гэта руплівым, адказным за даручаную справу рассветаўцам па сілах.
Увогуле мне неабыякава, што робіцца вакол. Я – патрыёт сваёй краіны, роднай зямлі, і галоўнае, каб у нас былі захаваны мір, спакой, адзінства народа.
Ад выбаршчыкаў у раённы Савет дэпутатаў 28 склікання па Мышкавіцкай акрузе №18 мы пачулі вось якія водгукі
Вера Іванаўна ЛІС, ветэран працы (пражывае ў д.№16 па вул.Арлоўскага): «Я вельмі задаволена тым, што наш «Рассвет» развіваецца, будуюцца новыя аб’екты, набываюцца сучасная тэхніка, абсталяванне. У тым, што працягваецца слава нашай гаспадаркі, заслуга кіраўніцтва, у прыватнасці, дырэктара А.І.Багеля і ўсіх працаўнікоў.
Я амаль 18 год адпрацавала даяркай, у 23 гады атрымала ордэн «Знак Пашаны». Тады на фермах усё рабілі ўручную, працэсы не былі механізаваны. А зараз фермы сучасныя, умовы працы – выдатныя.
Пазней шчыравала ў іншых падраздзяленнях гаспадаркі, у тым ліку 10 год – у цяпліцы.
Хочацца выказаць удзячнасць кіраўніцтву за тое, што аказваецца ўвага нам, ветэранам працы. Нас віншуюць з юбілейнымі датамі, святамі, уручаюць падарункі, запрашаюць на Дні вёскі, іншыя мерапрыемствы, дзе мы – у ліку ганаровых гасцей. Ведаем, што можна звярнуцца да кіраўніка гаспадаркі для вырашэння нейкіх праблемных пытанняў».
Андрэй Скраблевіч, аграном па абароне раслін ААТ «Рассвет імя К.П.Арлоўскага» (пражывае ў д.№4 па вул.Арлоўскага): «У «Рассвеце» працую са жніўня 2013 года. Закончыў Беларускую сельскагаспадарчую акадэмію. У калектыве знакамітай гаспадаркі прынялі добра – і кіраўніцтва, і калегі, умовы работы добрыя, зарплата задавальняе. Дырэктар А.І.Багель ставіцца да спецыялістаў з павагай, добразычлівасцю, зразумела, трэба заслужыць гэта сумленнымі адносінамі да справы, прафесіяналізмам. Сельгасарганізацыя набыла для нашай маладой сям’і жыллё, прадаставіўшы растэрміноўку аплаты. Прыемна, што дырэктар ідзе насустрач у вырашэнні такога важнага пытання. Жонка таксама працуе ў гаспадарцы, яна – бухгалтар. Дачка пайшла ў першы клас».
Жанна Іваніцкая, загадчык ясляў-садка аг.Мышкавічы (пражывае ў д.№24 па бульвары Будаўнікоў): «Адразу хачу выказаць удзячнасць А.І.Багелю за дапамогу, якую гаспадарка аказвае нашай дашкольнай установе ў выглядзе выдзялення бульбы, капусты, цыбулі,буракоў. Дзякуючы бясплатнай агародніне харчаванне таннее, і мы можам дазволіць сабе набыць дадаткова фрукты, кандытарскія вырабы. Сёлета нам аказалі дапамогу, дзякуючы якой мы набылі для дзяцей новыя стульчыкі. Прадаставіў «Рассвет» і навагоднія падарункі.
У Аляксандра Іванавіча заўжды можна знайсці разуменне, раней ён спрыяў вырашэнню пытання аказання дапамогі ў добраўпарадкаванні тэрыторыі садка.
Хачу таксама адзначыць работу, якая праводзіцца на тэрыторыі аграгарадку па навядзенні парадку, добраўпарадкаванні: наш калектыў прымае ў ёй актыўны ўдзел».
Наталля Хадакова,фота Максіма Мікешына, kirovsk.by