Пытанне: колькі разоў на год можна звярнуцца па прадастаўленне дзяржаўнай адраснай сацыяльнай дапамогі ў выглядзе аднаразовай сацыяльнай дапамогі?
Адказ: Аднаразовая сацыяльная дапамога прадастаўляецца сем’ям (грамадзянам) адзін раз на працягу каляндарнага года.
Пад каляндарным годам разумеецца перыяд з 1 студзеня па 31 снежня.
Паўторна на працягу каляндарнага года аднаразовая сацыяльная дапамога можа быць прадастаўлена сем’ям (грамадзянам), якія пацярпелі ў выніку стыхійных бедстваў, катастроф, пажараў і іншых надзвычайных сітуацый (абставінаў) непераадольнай сілы (форс-мажор), калі да гэтага яны рэалізавалі сваё права на аднаразовую сацыяльную дапамогу ў сувязі з іншай цяжкай жыццёвай сітуацыяй, якая парушае іх нармальную жыццядзейнасць.
Звяртаем увагу, што аднаразовая сацыяльная дапамога прадастаўляецца сем’ям (грамадзянам), якія апынуліся па аб’ектыўных прычынах у цяжкай жыццёвай сітуацыі, якая парушае нармальную жыццядзейнасць, пры ўмове, што іх сярэднедушавы даход складае не больш за 1,5 велічыні крытэрыю патрэбнасці.
Даведачна: пад цяжкай жыццёвай сітуацыяй, якая парушае нармальную жыццядзейнасць сям’і (грамадзяніна), разумеюцца аб’ектыўныя абставіны, складаныя для самастойнага вырашэння:
поўная непрацаздольнасць па прычыне інваліднасці або дасягнення грамадзянамі 80-гадовага ўзросту;
няздольнасць да самаабслугоўвання ў сувязі з захворваннем, для лячэння якога патрабуецца працяглае прымяненне лекавых сродкаў;
прычыненне шкоды жыццю, здароўю, маёмасці ў выніку стыхійных бедстваў, катастроф, пажараў і іншых надзвычайных сітуацый (абставінаў) непераадольнай сілы (форс-мажор), супрацьпраўных дзеянняў іншых асоб;
іншыя аб’ектыўныя абставіны, якія патрабуюць матэрыяльнай падтрымкі.