Выстава-кірмаш «Народныя брэнды Магілёўшчыны» адкрылася 19 лістапада каля Палаца культуры вобласці. Тэматычны гандаль прымеркаваны да абласнога фестывалю-кірмашу працаўнікоў вёскі «Дажынкі-2021». Яе ўдзельнікамі стала больш за 30 суб’ектаў гаспадарання з усяго рэгіёна. У шырокім асартыменце тут прадстаўлена прадукцыя грамадскага харчавання, кулінарныя і кандытарскія вырабы, харчовыя і нехарчовыя тавары. Тут можна набыць мясныя і малочныя прадукты, мёд, а таксама сувеніры, цацкі і іншыя вырабы. Падворкі кожнага раёна тэматычна аформленыя: «Свята хлеба» – Бялыніцкі раён, «Свята бульбы» – Бабруйскі раён, «Свята ягад і грыбоў» – Глускі раён, «Свята мёду» – Клімавіцкі раён, «Гусінае свята» – Касцюковіцкі раён, «Свята коласа» – Краснапольскі раён, «Свята лёну» – Хоцімскі раён і іншыя. На працягу дня на кожнай з пляцовак працуюць творчыя калектывы. На тэрыторыі, прылеглай да Палаца культуры вобласці, таксама працуюць выставы сельскагаспадарчай тэхнікі, спецтэхнікі МНС, тэматычныя пляцоўкі ўстаноў адукацыі, спорту рэгіёна. На вулічнай сцэне праводзяцца прэзентацыі ўсіх раёнаў Прыдняпроўскага краю, Магілёва і Бабруйска.
Фота Галіны Гаўрыловіч
Пры выкарыстанні матэрыялаў актыўная гіперспасылка на mogilev-region.gov.by абавязковая
