Капыль 4–5 верасня сустракаў гасцей Дня беларускага пісьменства, які праходзіў пад дэвізам «Слова нас аб’яднае». Арганізатары ператварылі горад у глабальную інтэрактыўную пляцоўку. Сюды прыехалі шматлікія госці з розных куткоў Беларусі. Удзел у святочных мерапрыемствах прынялі пісьменнікі Прыдняпроўскага краю і прадстаўнікі Магілёўскага аблвыканкама. Магілёўскае аддзяленне Саюза пісьменнікаў Беларусі падрыхтавала цікавую праграму «Нашых сэрцаў адкрытых адзіная мова». Яна складалася з чатырох блокаў: «Знаёмцеся, пісьменнікі Магілёўшчыны!», «Нашых сэрцаў адкрытых адзіная мова», «Вераснёвы настрой», «Мы – адна пісьменніцкая сям’я». У кожным гучалі адпаведныя вершы і празаічныя творы.
«Мы часцінка роднай зямлі. Працуем, ствараем будучыню, нясём людзям высокадухоўнае слова. Дзень беларускага пісьменства –значнае свята для пісьменнікаў. Беларускі народ – непадзельны. Кажучы мовай матэматыкаў, гэта не тэарэма, якую трэба даказваць, а аксіёма, якая не патрабуе доказаў. Такая ісціна жыве ў сэрцы кожнага беларуса. І Дзень беларускага пісьменства –найлепшы таму доказ», – падкрэсліў старшыня Магілёўскага аддзялення Саюза пісьменнікаў Беларусі Алесь Казека.
Пры выкарыстанні матэрыялаў актыўная гіперспасылка на mogilev-region.gov.by абавязковая