Раённае свята працаўнікоў вёскі «Дажынкі-2019» прайшло 8 лістапада ў Глуску. На цэнтральных вуліцах размясціліся выставы-кірмашы народнай творчасці, гандлёвыя рады і канцэртныя пляцоўкі пад адкрытым небам. Госці свята ўраджаю маглі паўдзельнічаць у майстар-класах рамеснікаў і набыць сувеніры ручной працы. Свае падворкі ў нацыянальным стылі прадставілі не толькі народныя калектывы з самога Глуска, але і суседзі з Бабруйскага, Кіраўскага і Асіповіцкага раёнаў. Забавы для гасцей «Дажынак» былі на любы густ і ўзрост: працавалі дзіцячыя гульнявыя пляцоўкі і атракцыёны, аматары актыўнага адпачынку маглі паўдзельнічаць у спартландыі. На абноўленым стадыёне прайшоў футбольны матч паміж камандамі ветэранаў «Белшына-Бабруйск» і «Днепр-Магілёў». Таксама адкрыўся шматпрофільны цэнтр «Арыён», дзе размясціліся канцэртная зала і кінатэатр, студыі для дзіцячай творчасці і загс. Побач з’явіўся новы арт-аб’ект – культурная кампазіцыя «Роднае гняздо» Магілёўскага скульптара Андрэя Вараб’ёва. У цырымоніі адкрыцця цэнтра прынялі ўдзел старшыня Магілёўскага аблвыканкама Леанід Заяц і памочнік Прэзідэнта – інспектар па Магілёўскай вобласці Міхаіл Русы.
Фото - mogilevnews.by
Пры выкарыстанні матэрыялаў актыўная гіперспасылка на mogilev-region.gov.by абавязковая
