4,8 тысячы гектараў новых лясоў высадзяць у Магілёўскай вобласці сёлета

У гэтым годзе ў Магілёўскай вобласці плануецца пасадзіць 35 мільёнаў дрэў на плошчы 4,8 тысячы гектараў. Асноўны масіў працы прыйдзецца на вясну: у гэты перыяд 25 мільёнаў новых дрэў высадзяць на плошчы 4 тысячы гектараў, з якіх каля 2 тысяч гектараў - бураломныя лесасекі.

 

- У мінулым годзе Магілёўская вобласць больш за ўсіх пацярпела ад ураганных вятроў, - нагадаў вядучы інжынер па лесанасеннай гаспадарцы Магілёўскага ДВЛГА Вячаслаў Галаўнёў. - Тады было пашкоджана 7 тысяч гектараў лесу. Сярод найбольш пацярпелых Магілёўскі, Чавускі, Клімавіцкі, Чэрыкаўскі і Быхаўскі лясгасы. Гэтыя тэрыторыі і будзем аднаўляць, плануем скончыць да вясны 2024 года. Высадзім асноўныя лесаўтваральныя пароды - хвою і елку, на ніжэйшых участках - алешыну і ясень. Яшчэ 700 гектараў плануем засадзіць па восені: трэба пачысціць і падрыхтаваць бураломныя пасекі.