Абласной ветэранскай арганізацыяй вылучаны кандыдаты ў дэлегаты УНС

VII пленум савета абласной арганізацыі Беларускага грамадскага аб'яднання ветэранаў прайшоў сёння ў Магілёве пад старшынствам Анатоля Глаза. Асноўным пытаннем на парадку дня было вылучэнне кандыдатаў у дэлегаты Усебеларускага народнага сходу Рэспублікі Беларусь і выбранне дэлегатаў на X канферэнцыю Беларускага грамадскага аб'яднання ветэранаў.

Удзел у пасяджэнні прынялі намеснік начальніка галоўнага ўпраўлення ідэалагічнай работы і па справах моладзі аблвыканкама Алег Пішчанка, начальнік галоўнага ўпраўлення юстыцыі аблвыканкама Андрэй Сталяроў, намеснік старшыні БГАВ, старшыня камітэта ветэранаў працы Юрый Дзядкоў.

«Крытэрыі адбору былі вельмі простымі. Па-першае, улічваліся заслугі чалавека перад рэспублікай і вобласцю ў час актыўнай працоўнай дзейнасці, па-другое, удзел у рабоце абласной ветэранскай арганізацыі, - расказаў Анатоль Глаз. - Гэта вядомыя, заслужаныя людзі ў нашым рэгіёне, якія ўсё свядомае жыццё працавалі на карысць сваёй краіны. Пасля таго, як на рэспубліканскай канферэнцыі гэтыя кандыдатуры будуць падтрыманы, мы збяромся і калектыўна абмяркуем, якія пытанні будзем выносіць на ВНС ад імя ветэранскай арганізацыі. У сваёй жа працы кожнаму з абраных мы вызначым праграму канкрэтнай памесячнай працы ў працоўных калектывах, на дыялогавых пляцоўках і г.д.»

Паводле яго слоў, цяпер УНС будзе мець юрыдычны статус, з чаго вынікае пашырэнне паўнамоцтваў: прызначэнне суддзяў, узгадненне ўрада і іншыя: «Гэта значны орган народаўладдзя і важна, што неаднаразова падкрэсліваў кіраўнік дзяржавы, каб туды трапілі неабыякавыя людзі. Гэта не значыць, што абавязкова павінна быць актыўная дыскусія, але прапановы, якія ўносяцца, павінны быць канструктыўнымі. Закон павінен мець прамое дзеянне».

Як падкрэсліў Анатоль Глаз, у абласной ветэранскай арганізацыі налічваецца 228 тыс. чалавек: «У складзе пяці камісій яны займаюцца патрыятычным выхаваннем, працай з моладдзю, узаемадзеяннем з дэпутатамі, іншымі задачамі. Акрамя таго, штогод мы вызначаем асноўны напрамак. Напрыклад, два гады таму са школьнікамі мы ўвасаблялі праект па стварэнні макетаў спаленых вёсак. А таксама вылучылі ідэю стварэння Кнігі працоўнай славы ў кожным раёне, сёння гэтая праца заканчваецца - засталося чатыры раёны. У мінулым годзе ў нас была пасадка лесу, колка дроў і размеркаванне іх адзінокім. Акцыя працягнецца і сёлета. Таксама нядаўна мы аб'явілі конкурс для школьнікаў па стварэнні макетаў узнагарод часоў Вялікай Айчыннай вайны: першы этап конкурсу прымеркаваны да 80-годдзя вызвалення Беларусі ад нямецка-фашысцкіх захопнікаў, другі - да 80-годдзя Перамогі ў Вялікай Айчыннай вайне. Па водгуках з рэгіёнаў - школьнікі актыўна ўключыліся ў працу: наведваюць бібліятэкі, вывучаюць гісторыю ўзнагарод».

Па выніках работы пленума ад абласной ветэранскай арганізацыі было вылучана дзесяць кандыдатаў у дэлегаты Усебеларускага народнага сходу, выбраны дэлегаты канферэнцыі. Таксама падчас мерапрыемства актывістам былі ўручаны заслужаныя ўзнагароды ад Беларускага грамадскага аб'яднання ветэранаў.

Юлія Таранава, фота Галіны Гаўрыловіч