Абласны этап Рэспубліканскай ваенна-патрыятычнай гульні «Арляня» пройдзе ў Магілёве 12 мая

Абласны этап Рэспубліканскай ваенна-патрыятычнай гульні «Арляня» сярод школьнікаў 8-11 класаў адбудзецца 12 мая ў воінскай часці № 72471 у Пашкова. Пра гэта паведамілі ў Магілёўскім абласным камітэце грамадскай арганізацыі «Беларускі рэспубліканскі саюз моладзі».

Усяго ў абласным этапе прымуць удзел 11 каманд па 10 чалавек.

Падчас спаборніцтваў каманды прадэманструюць свае ўменні, навыкі і веды ў ваенна-спартыўных і конкурсных мерапрыемствах: ваенізаваная гульня на мясцовасці «Час каманды»; агляд строю і песні «Кожны з нас у страі!»; конкурс «Выдатны стрэлак»; ваенна-спартыўны конкурс «Мужнасць! Адвага! Гонар!»; конкурс «Баявы лісток»; інтэлектуальны турнір «Помнім аб мінулым, ганарымся сучаснасцю, думаем аб будучыні!».

«Мэта гульні - удасканаленне сістэмы патрыятычнага выхавання і ўзроўню дапрызыўнай падрыхтоўкі навучэнцаў, а таксама садзейнічанне станаўленню актыўнай грамадзянскай пазіцыі маладых грамадзян», - падкрэслілі субяседнікі.

Арганізатарамі гульні з'яўляюцца: галоўнае ўпраўленне па адукацыі Магілёўскага аблвыканкама, Ваенны камісарыят Магілёўскай вобласці, Дзяржаўная ўстанова дадатковай адукацыі «Магілёўскі цэнтр творчасці», Магілёўскі абласны камітэт ГА «БРСМ».

Рэд.