Абноўленыя дамы, дарогі і рэканструкцыя Цэнтра культуры: Хоцімск рыхтуецца да абласных «Дажынак»

У суботу, 7 кастрычніка, Хоцімск прыме абласны фестываль-кірмаш працаўнікоў вёскі «Дажынкі-2023». Да свята населены пункт сур'ёзна змяніўся. Пра гэта расказаў намеснік старшыні Хоцімскага райвыканкама Аляксандр Анжэнка.

«У гэтым годзе ў нас былі капітальна адрамантаваны пяць шматкватэрных жылых дамоў, - адзначыў ён. - Таксама прайшоў рамонт вулічна-дарожнай сеткі населенага пункта на агульную суму больш за Br2,5 млн. Работы ахапілі вуліцу Набярэжную, плошчу Леніна, завулак Астроўскага, вуліцы Камсамольскую і Садовую».

У гарадскім пасёлку працягваецца рэканструкцыя Хоцімскай цэнтральнай раённай бальніцы. У гэтым годзе населены пункт прырос важным і патрэбным аб'ектам - тут здалі ў эксплуатацыю басейн «Каскад», кошт якога склаў больш як Br7 млн.

Яшчэ адзін аб'ект, у якім правялі рэканструкцыю, - раённы Цэнтр культуры «Мір». Для гэтых мэт было выдзелена Br5,3 млн. «Тут з'явілася новая прыбудова, было поўнасцю заменена тэхналагічнае абсталяванне, адрамантавалі фасад і дах. Будынак Цэнтра культуры поўнасцю абнавіўся. Яго ўрачыстае адкрыццё пройдзе падчас абласнога фестывалю-кірмашу працаўнікоў вёскі», - распавёў Аляксандр Анжэнка.

Па словах намесніка старшыні райвыканкама, у гэтым годзе ў населеным пункце былі праведзены вялікія аб'ёмы будаўнічых работ. «Вядома, для жыхароў вельмі важныя гэтыя змены. Бо гэта напрамую ўплывае на ўзровень і якасць жыцця. І яны ўдзячныя за ўсё, што было зроблена, - падкрэсліў ён. - Важна, што гэтым пытанням у нас надаецца самая пільная ўвага на ўсіх узроўнях».

У суботу Хоцімск будзе прымаць абласны фестываль-кірмаш працаўнікоў вёскі «Дажынкі-2023». У праграме свята - работа тэматычных пляцовак, выстава-кірмаш, дзе будзе прадстаўлена сельскагаспадарчая прадукцыя прадпрыемстваў рэгіёну, тут жа можна будзе азнаёміцца з брэндамі Магілёўскай вобласці. Гандаль шырокім асартыментам разнастайных тавараў, выставы сельскагаспадарчай тэхнікі, караваяў сёлетняга ўраджаю, тэматычная фотавыстава, гульнявыя і спартыўныя зоны, пляцоўка МНС, канцэртныя і творчыя праграмы - кожны госць зможа знайсці занятак па гусце. Самая чаканая частка свята - узнагароджанне пераможцаў спаборніцтва ў развіцці аграпрамысловага комплексу. Працягнецца свята канцэртнымі выступамі, якія завершацца маляўнічым феерверкам.