Адзіны ўрок, прысвечаны Дню народнага адзінства, пройдзе ва ўсіх школах краіны 17 верасня

У рамках 86-й гадавіны ўз'яднання Заходняй Беларусі і БССР ва ўстановах адукацыі 17 верасня пройдзе адзіны ўрок, прысвечаны Дню народнага адзінства. Пра гэта паведаміў начальнік галоўнага ўпраўлення выхаваўчай работы і маладзёжнай палітыкі Міністэрства адукацыі Віктар Доўнар.

Прадстаўнік Мінадукацыі адзначыў, што ўрок будзе накіраваны на фарміраванне ў вучняў паважлівых адносін да гістарычнага мінулага краіны, разуменне сэнсу і значэння дзяржаўнага свята, важнасці адзінства беларускага народа для захавання моцнай і незалежнай дзяржавы, а таксама на выхаванне грамадзянскасці, патрыятызму, адказнасці і гатоўнасці дзейнічаць на карысць сваёй Радзімы.

«Па традыцыі на адзіныя ўрокі будуць запрошаны прадстаўнікі дзяржорганаў, знакамітыя людзі, якія ўнеслі значны ўклад у развіццё нашай краіны. Спецыялістамі падрыхтавана прыкладная матрыца ўрока, а таксама прэзентацыя, якія будуць размешчаны на адукацыйным партале Акадэміі адукацыі. Прапанаваная інфармацыя будзе ўлічваць узроставыя асаблівасці, зыходзячы з таго праводзіцца ўрок у пачатковай, сярэдняй ці старэйшай школе. Упэўнены, што ўрокі пройдуць традыцыйна на высокім арганізацыйным узроўні. Гэта свята маладое для нашай краіны, але вельмі важнае і значнае для сэрца кожнага беларуса», - распавёў Віктар Доўнар.

Ён падкрэсліў, што педагогі, праводзячы адзіны ўрок у старэйшых класах, будуць абапірацца на веды дзяцей, атрыманыя на ўроках гісторыі. Для малодшых школьнікаў аповед будзе мець больш апавядальны характар.

«Дзецям раскажуць непасрэдна пра падзеі, якія сталі гістарычнай асновай свята, пра значэнне гэтага свята для сучаснай Беларусі, і важнасць адзінства беларускага народа для захавання незалежнасці і суверэнітэту нашай краіны. Кожная ўстанова самастойна вызначае, хто будзе праводзіць гэтыя ўрокі. Як правіла, гэта класныя кіраўнікі альбо настаўнік гісторыі, калі занятак запланаваны для цэлай паралелі класаў. Урок можа правесці грамадскі дзеяч або запрошаны прадстаўнік улады, які ведае гэтую тэму і зможа расказаць пра падзеі тых гадоў», - праінфармаваў начальнік галоўнага ўпраўлення.

БЕЛТА