Акцыя «Дзень абароны дзяцей з БРСМ» ахопіць больш за 500 юных жыхароў Магілёўскай вобласці

Больш за 500 дзяцей павіншуюць у Магілёўскай вобласці падчас правядзення акцыі «Дзень абароны дзяцей з БРСМ». Пра гэта паведаміла галоўны спецыяліст абкама БРСМ Анжаліка Яўных.

Рэспубліканская дабрачынная акцыя «Дзень абароны дзяцей з БРСМ» праходзіць з 30 мая па 3 чэрвеня. Самым насычаным днём у яе праграме стане 1 чэрвеня: ва ўсіх кутках рэгіёна пройдуць адпаведныя мерапрыемствы. Напрыклад, у Магілёве удзельнікамі ініцыятывы стануць каля 50 хлопчыкаў і дзяўчынак. Так, валанцёры БРСМ адправяцца ў 5 дамоў сямейнага тыпу, дзе правядуць для выхаванцаў забаўляльныя праграмы з роставымі лялькамі. У завяршэнне свята кожны дзіця атрымае памятны падарунак.

Валанцёры руху «Добрае сэрца» разам з Магілёўскім абласным камітэтам БРСМ наведаюць 1 чэрвеня выхаванцаў дзіцячага дома сямейнага тыпу з в. Мікалаеўка Магілёўскага раёна. Яны правядуць гульнявую праграму і перададуць шматдзетнай сям’і Марчанка падарункі да Міжнароднага дня абароны дзяцей. У гэты ж дзень валанцёры саюза моладзі Бабруйскага каледжа імя А. Я. Ларына наведаюць цэнтр дзённага знаходжання дзяцей з множнымі парушэннямі «Цёплы дом», дзе пагутараць з выхаванцамі і падораць салодкія падарункі. У Кіраўску актывісты прыедуць з забаўляльнымі гульнямі ў дом сямейнага тыпу Калінкіных.

«Дабрачынная акцыя накіравана на аказанне адраснай сацыяльнай падтрымкі дзецям, дзіцячым дамам сямейнага тыпу і інтэрнатным установам, на выхаванне духоўна-маральных якасцей падрастаючага пакалення, – заключыла Анжаліка Яўных. – Акрамя таго, яна прывівае культуру міласэрнасці і ўзаемадапамогі».

БЕЛТА