Актывісты БРСМ Магілёўскай вобласці павіншуюць жанчын, якія нарадзілі дзяцей напярэдадні Дня маці

Мерапрыемствы арт-эстафеты Беларускага рэспубліканскага саюза моладзі “Слова, першае ў жыцці...» праходзяць ва ўсіх рэгіёнах Магілёўскай вобласці. Пра гэта паведамілі ў АК ГА «БРСМ».

Актывісты арганізацыі праводзяць тэматычныя спартыўныя святы, спаборніцтвы маладых мам, майстар-класы і інтэрактыўныя праграмы, творчыя сустрэчы, ушанаванні маці, выставы, пасяджэнні клубаў маладых сем’яў, канцэрты мастацкай самадзейнасці, віншаванні ў радзільных дамах.

Так, 14 кастрычніка ў 9.15 абласная арганізацыя БРСМ арганізуе на базе Магілёўскай гарадской бальніцы хуткай медыцынскай дапамогі акцыю «Першае слова – МАМА!». Лідар Беларускага рэспубліканскага саюза моладзі Магілёўшчыны Уладзімір Паўлоўскі і валанцёры руху БРСМ «Добрае сэрца» наведаюць з прыемнай місіяй радзільнае аддзяленне ўстановы аховы здароўя. З цёплымі пажаданнямі яны ўручаць мамам і дзецям, якія нарадзіліся напярэдадні Дня маці, дзіцячую вопратку і кветкі.

Аналагічная акцыя пройдзе ў Клімавіцкай цэнтральнай раённай бальніцы, а ў Круглянскай райбальніцы валанцёры наведаюць дзіцячае аддзяленне і павіншуюць са святам маці і дзетак, якія знаходзяцца там на лячэнні.