«Александрыя» збірае сяброў на Купалле - 2023» - праграма фестывалю-свята абяцае шмат цікавага

У аграгарадку Александрыя Шклоўскага раёна 8 ліпеня адбудзецца купальскі фестываль-свята «Александрыя» збірае сяброў - 2023». З праграмай мерапрыемства можна азнаёміцца на сайце.

Ужо традыцыйныя гулянні пройдуць у маляўнічым месцы на беразе Дняпра каля маста, які злучае два населеныя пункты (Александрыю і Копысь), і дзве вобласці (Магілёўскую і Віцебскую).

Праграма сёлета запланавана насычаная. З 11 гадзін будуць працаваць тэматычныя пляцоўкі прадпрыемстваў, рэгіёнаў Беларусі і краін - удзельніц свята. Дэвіз «Купалля – 2023»: «Абярэг міру і саюзнага адзінства». Пад гэтым лозунгам пройдуць разгорнутыя прэзентацыйныя экспазіцыі і выставы твораў майстроў.

Госці свята змогуць пабалець за ўдзельнікаў Рэспубліканскага сямейнага сельскагаспадарчага праекта «Уладар сяла», паспаборнічаць у збіранні карт-пазлаў на хуткасць, праверыць сваю фізічную падрыхтоўку на спартыўнай пляцоўцы. А таксама наведаць выставу «100 ідэй для Магілёўшчыны» і паглядзець фільмы ў «Палявым кінатэатры».

Будзе працаваць і спецыяльная цыркавая зона, і шматлікія пункты продажу сувенірнай і кандытарскай прадукцыі. На працягу дня запланавана шырокая канцэртная праграма з удзелам творчых калектываў з абласцей і сталіцы.

Апагеем свята стане гала-канцэрт «Саюзныя зоркі ў гасцях у Александрыі» з удзелам зорак беларускай і расійскай эстрады. У праграме - хіты, правераныя часам, а таксама новыя песні, якія ўжо знаходзяцца на вяршыні хіт-парадаў Саюзнай дзяржавы.

 СБ