Алена Афанасьева: важна уніфікаваць заканадаўства для росту дабрабыту насельніцтва Саюзнай дзяржавы

Стаіць задача забяспечыць дабрабыт насельніцтва Саюзнай дзяржавы, а не асобна народаў Беларусі і Расіі. Аб гэтым журналістам заявіла старшыня Камісіі Парламенцкага сходу па працы, сацыяльнай палітыцы і ахове здароўя Алена Афанасьева падчас круглага стала ў праграме фестывалю творчасці інвалідаў «Разам мы зможам больш» у Магілёве.

«Саюзная дзяржава - элемент міжнароднай палітыкі, які павінен служыць прыкладам для іншых дзяржаваў, - адзначыла Алена Афанасьева. - Стаіць задача забяспечыць дабрабыт насельніцтва Саюзнай дзяржавы, а не асобна народаў Беларусі і Расіі. Таму важна уніфікаваць заканадаўства так, каб эканоміка працавала на дабрабыт нашых людзей. У гэтым мы бачым вялікія плюсы і для сацыяльнага складніка, у тым ліку адукацыі і аховы здароўя. Забяспечваючы роўныя магчымасці, мы можам дабіцца роўных правоў. Зрэшты, як і наадварот: калі мы будзем гарантаваць кожнаму роўныя правы на тэрыторыі Расіі і Беларусі, то будзем ствараць гэтыя магчымасці - адно рухае іншае».

На думку Алены Афанасьевай, вырашэнне гэтых пытанняў залежыць у тым ліку і ад парламентарыяў, у прыватнасці ад іх прафесіяналізму і пісьменнасці. «У склад Парламенцкага сходу дэлегаваны самыя прафесійныя людзі, якія зацікаўлены не проста ў атрыманні выніку, а ў будаўніцтве Саюзнай дзяржавы, - падкрэсліла яна. - І мы будзем працаваць для таго, каб з'явіліся гэтыя роўныя магчымасці для забеспячэння роўных правоў».

У якасці прыкладу Алена Афанасьева прывяла пілотны праект па рэгістрацыі тэхнічных сродкаў сацыяльнай рэабілітацыі па паскоранай праграме, які таксама ініцыявалі парламентарыі. «Пытанне рэабілітацыі людзей з інваліднасцю і забеспячэння іх тэхнічнымі сродкамі вельмі важнае, - адзначыла старшыня камісіі Парламенцкага сходу. - У нас розны падыход, і задача парламентарыяў – каб быў раўназначны доступ тэхнічных сродкаў, якія вырабляюцца ў Беларусі, на расійскі рынак і наадварот. Адпаведныя прапановы зыходзілі ад нас неаднаразова, а пытанне ўздымалася на высокім узроўні».

БЕЛТА