Алімпіяда па фінансавай граматнасці пройдзе ў Беларусі ў верасні–снежні

Рэспубліканская алімпіяда па фінансавай граматнасці сярод навучэнцаў X–XI класаў устаноў агульнай сярэдняй адукацыі пройдзе ў Беларусі ў верасні–снежні 2020 года, як паведамілі ва ўпраўленні інфармацыі і грамадскіх сувязяў Нацыянальнага банка.

Алімпіяда пройдзе ў чатыры этапы: ва ўстановах адукацыі – у верасні, раённы этап – 23 кастрычніка, абласны (мінскі гарадскі) этап – 20 лістапада, заключны – 18 снежня ў Нацыянальным банку. Заданні будуць уключаць пытанні ў выглядзе тэстаў з варыянтамі адказаў па наступных тэмах: асабістыя фінансы, наяўныя грошы, зберажэнні, запазычанні, лічбавы банкінг, дзейнасць цэнтральнага банка, страхаванне, падаткі, інвестыцыі. Таксама ўключаны шэраг задач на разлікі і вылічэнні, якія тычацца фінансаў.

У дапамогу старшакласнікам і педагогам для падрыхтоўкі да алімпіяды Нацбанк распрацаваў метадычныя рэкамендацыі, якія ўключаюць апісанне тэм заданняў, рэкамендуемыя крыніцы інфармацыі, прыклады пытанняў з адказамі і тлумачэннямі. З метадычнымі рэкамендацыямі можна азнаёміцца на адзіным партале фінансавай граматнасці www.fingramota.by.

Алімпіяда з 2014 года праходзіць у Беларусі штогод і з’яўляецца адным з найбольш маштабных нацыянальных мерапрыемстваў па павышэнні фінансавай граматнасці. За гэтыя гады свае фінансавыя веды змаглі праверыць каля 95 тыс. навучэнцаў, у тым ліку ў мінулым годзе – больш за 24 тыс. старшакласнікаў з прыкладна 2,1 тыс. устаноў адукацыі. Арганізатары алімпіяды – Нацыянальны банк і Міністэрства адукацыі.

БЕЛТА