Альманах «Прыдняпроўе: Магілёўшчына літаратурная» прысвяцілі Году малой радзімы

У Магілёве выдадзены альманах «Прыдняпроўе: Магілёўшчына літаратурная», прысвечаны Году малой радзімы, паведаміў старшыня Магілёўскага абласнога аддзялення грамадскага аб'яднання «Саюз пісьменнікаў Беларусі» (СПБ) Аляксандр Казека.

У выданне ўвайшлі творы сучаснікаў, напісаныя ў 2017-2019 гадах, з ілюстрацыямі і анатацыямі. «Мы пастараліся ахапіць шырокае кола аўтараў і жанраў з запрашэннем рускіх літаратараў. Атрымалася сузор'е ўжо заваяваўшых сімпатыі імёнаў, крыху новых адкрыццяў, разнастайнасць тэм і далучанасць да тэматыкі малой радзімы», – адзначыў Аляксандр Казека.

Альманах адкрываецца раздзелам «Паэзія», які знаёміць з дасягненнямі на паэтычнай ніве членаў Магілёўскага аддзялення СПБ. У ліку ўжо вядомых імёнаў: Марына Сліўко, Ніна Кавалёва, Мікалай Леўчанка, Наталля Міхальчук, Сяргей Рынкевіч, Мікалай Мінчанка, Мікалай Салаўцоў, Вольга Бялова, а таксама новыя імёны аддзялення – не менш вядомыя чытачам Валянціна Габрусева і Уладзімір Ясеў са сваёй лірыкай.

Раздзел «Проза», калі параўноўваць з папярэднім, невялікі, але і тут мільгаюць як знаёмыя імёны, напрыклад, Віктар Кунцэвіч у злёгку нязвыклым амплуа празаіка, так і тыя, хто далучыўся ў апошні час, – Алена Кісель. А затым альманах плаўна выходзіць за гарызонты магілёўскай літаратуры і адкрывае новы раздзел «Нашы сябры», запрашаючы на свае старонкі цэлую чараду выбітных рускіх літаратараў: Алег Дарагань, Уладзімір Сарочкін, Надзея Драбышэўская, Наталля Мішына, Ілья Цароў, Вячаслаў Іваноў і іншыя.

Нямала старонак адведзена і пад рубрыку «Новыя імёны». Сярод адкрыццяў тыя, хто ўліўся ў шэрагі СПБ зусім нядаўна: Наталля Ніканчук і Леанід Іскроў. Свежымі паэтычнымі радкамі дзеляцца Вольга Гардзей і Міхаіл Клапоцкі, Таццяна Лебедзева і Наталля Кажэўнікава. Упершыню ў зборніку з'явіўся раздзел «Пераклады», дзе паказана, як мовы ўзаемадзейнічаюць паміж сабой. Прычым убачыць гэта ўзаемадзеянне можна як на матэрыяле сучасных аўтараў,

так і на прыкладзе класікі: пераклад на рускую мову Аленай Кісель вершаў Аркадзя Куляшова і Пімена Панчанкі, пераклад Сяргеем Украінкам вершаў польскага паэта Анджэя Бурсы.

У раздзеле «Публіцыстыка» чытачу прапануюцца нарысы і нататкі пра Вялікую Айчынную вайну ад Віктара Арцем'ева і Аляксандра Балдоўскага, краязнаўчае даследаванне пра Аляксея Пысіна Мікалая Барысенкі і філасофска-іранічныя фельетоны ад Яўгена Булавы. Невялікі, але ёмісты раздзел «Крытыка і літаратуразнаўства» адкрываюць артыкулы выкладчыкаў Магілёўскага дзяржаўнага ўніверсітэта імя А.А. Куляшова: Сяргея Сомава, Яраслава Клімуця, Алены Балтоўскай, прысвечаныя розным крытычным і літаратуразнаўчым пытанням, ад аналізу паэзіі Георгія Каніскага да шырокага агляду рускамоўнай паэзіі Беларусі.

А на дэсерт у альманаху прадстаўлены раздзел «Сатыра і гумар»: чытача чакае сустрэча з гумарыстычнай прозай Анатоля Мельнікава, Мікалая Падабеда, Міхаіла Уласенкі і Мікалая Леўчанкі.

Як падкрэсліў Аляксандр Казека, «па сутнасці, у нас атрымаўся выпуклы і дакладны адбітак з літаратурнага працэсу Магілёўшчыны, у якім адлюстраваны дасягненні абласнога аддзялення СПБ».

БЕЛТА