Аляксандр Гарошкін: вынік будзе толькі ў тым выпадку, калі працуюць усе ўзроўні дэпутацкага корпуса

Вынік будзе толькі ў тым выпадку, калі працуюць усе ўзроўні дэпутацкага корпуса. Такое меркаванне выказаў старшыня Магілёўскага абласнога Савета дэпутатаў Аляксандр Гарошкін пасля сустрэчы старшыні Палаты прадстаўнікоў Нацыянальнага сходу Ігара Сергяенкі і дэпутацыі Палаты прадстаўнікоў ад Магілёўскай вобласці з кіраўніцтвам і членамі Магілёўскага аблвыканкама.

«Калі толькі праходзілі выбары, гаворка ішла аб тым, што ў дэпутацкі корпус народ вылучае менавіта тых людзей, якія здольныя працаваць і карыстаюцца аўтарытэтам, - адзначыў ён. - Выканаўчая ўлада на сённяшні момант робіць усё для таго, каб дэпутат як народны абраннік мог пайсці да людзей і казаць аб выніках працы. Застаецца толькі ісці, размаўляць з людзьмі, выслухоўваць іх праблемы і разам з выканаўчай уладай і дэпутатамі больш высокага ўзроўню вырашаць пытанні людзей. Вынік будзе толькі ў тым выпадку, калі будуць працаваць усе ўзроўні дэпутацкага корпуса. І ў Магілёўскай вобласці такі вынік ёсць, хаця і прайшло толькі шэсць месяцаў пасля выбараў».

Аляксандр Гарошкін падкрэсліў, што для дэпутата не павінна быць нязначных пытанняў. «Можа быць, вырашэнне гэтага пытання не каштуе вялікіх затрат, але для чалавека гэта вельмі важна, - падкрэсліў ён. - Як правіла, звароты тычацца паляпшэння ўзроўню жыцця людзей, але ёсць і такія, якія закранаюць змены на ўзроўні заканадаўчай улады. Мы ўсё гэта акумулюем і перадаем у Палату прадстаўнікоў і Савет рэспублікі. Добрая практыка - правядзенне Адзінага дня дэпутата, калі дэпутаты ўсіх узроўняў раз'язджаюцца па сваіх акругах, праводзяць прыёмы грамадзян, а потым збіраюцца разам, абмяркоўваюць пытанні, якія ўзніклі ў людзей, і прымаюць па іх рашэнні».

Дэпутат расказаў, што як старшыня абласнога Савета праводзіць прыёмы грамадзян кожны месяц. Як правіла, на іх прыходзіць у сярэднім па чатыры-пяць чалавек. «Я яшчэ праводжу штомесячныя прыёмы як парламентарый у сваіх акругах, на якія таксама прыходзіць не менш за сем-восем чалавек. Каля 40 працэнтаў зваротаў могуць здымацца на ўзроўні раёна і горада, астатнія пытанні патрабуюць больш шчыльнай прапрацоўкі. Напрыклад, з усіх зваротаў за апошнія пяць месяцаў актыўнай працы ў мяне на кантролі знаходзяцца восем пытанняў, якія патрабуюць для вырашэння больш працяглага тэрміна. Яны ўсё роўна будуць вырашаныя, хоць для гэтага і спатрэбіцца адшукаць час і грашовыя сродкі», - сказаў на заканчэнне Аляксандр Гарошкін.

БЕЛТА