Аляксандр Лукашэнка даручыў перавесці заражаных каранавірусам на лячэнне з раённых бальніц у абласныя

Прэзідэнт Беларусі Аляксандр Лукашэнка лічыць, што заражаных каранавірусам грамадзян варта размясціць у абласных бальніцах. Адпаведнае даручэнне кіраўнік дзяржавы даў падчас паездкі ў Смалявіцкі раён.

На Вялікдзень Аляксандр Лукашэнка наведаў Свята-Благавешчанскі Лядзенскі храм у вёсцы Малыя Ляды. Аднак перад прыбыццём у царкву ён паспеў пагутарыць з кіраўніком Адміністрацыі Прэзідэнта Ігарам Сяргеенкам і старшынёй Мінскага аблвыканкама Аляксандрам Турчыным. Кіраўнік дзяржавы пацікавіўся, як развіваецца сітуацыя з каранавірусам у цэлым па краіне і ў цэнтральным рэгіёне ў прыватнасці. Як далажылі Прэзідэнту, сітуацыя стабільная, рэзкага ўсплёску захворвання не адзначаецца.

«Спадзяёмся, што тэндэнцыя будзе да зніжэння. У мяне літаральна за суткі працэнтаў на трыццаць менш тых, хто захварэў на пнеўманію», – праінфармаваў губернатар. Паводле яго слоў, у абласныя ўстановы ўжо паступілі кітайскія медпрэпараты, якія пры лячэнні каранавіруса на ранніх стадыях даюць добры эфект.

«Будзем спадзявацца, што сітуацыя будзе развівацца вось так, як цяпер», – ацаніў абстаноўку Прэзідэнт.

У той жа час ён лічыць неабходным перавесці інфіцыраваных COVID-19 з раённых цэнтраў у абласныя – гэта дапаможа лепш кантраляваць сітуацыю і аказваць хворым больш кваліфікаваную дапамогу. Да таго ж з’явіцца магчымасць прывесці ў парадак раённыя бальніцы, зыходзячы з ужо наяўнага вопыту.

«Людзей лепш трымаць у абласных цэнтрах, не ў раёне», – сказаў Аляксандр Лукашэнка.

БЕЛТА