Аляксандр Лукашэнка падпісаў указ аб узмацненні ролі старшынь выканкамаў базавага ўзроўню

Прэзідэнт Беларусі Аляксандр Лукашэнка 21 лютага падпісаў указ нумар 74 «Аб узмацненні ролі старшынь выканаўчых камітэтаў базавага ўзроўню ў развіцці рэгіёнаў». Аб гэтым паведамілі ў прэс-службе кіраўніка дзяржавы.

Органы мясцовага кіравання адыгрываюць ключавую ролю ў забеспячэнні высокай якасці жыцця. Непасрэднае ўзаемадзеянне з людзьмі дае магчымасць раённым і гарадскім (гарадоў абласнога падпарадкавання) выканкамам глыбока ведаць патрэбнасці насельніцтва, своечасова рэагаваць на ўзнікаючыя праблемы і вырашаць увесь комплекс задач па развіцці падведамных тэрыторый.

Указам вызначаны новыя інструменты для павышэння дабрабыту рэгіёнаў і грамадзян праз узмацненне статусу мясцовых выканкамаў і іх старшынь, больш эфектыўнае мясцовае кіраванне.

У прыватнасці, пашыраны фінансавыя магчымасці выканкамаў базавага ўзроўню для развіцця тэрыторый і задавальнення патрэбнасцей грамадзян.

У мэтах выканання мерапрыемстваў у рамках Года добраўпарадкавання прадастаўлены правы актыўна ўключаць грамадзян і арганізацыі ў агульную справу па навядзенні парадку ў краіне.

Спрашчаюцца правілы рэалізацыі агульнараспаўсюджаных карысных выкапняў, у асноўным пяску, грамадзянам для ўласных патрэб, а таксама арганізацыям для добраўпарадкавання і ўтрымання тэрыторый, сельскагаспадарчых аб'ектаў.

Па ўзгадненні з рай-, гарвыканкамамі цяпер павінны прымацца рашэнні, якія прадугледжваюць спыненне дзейнасці важных для раёна аб'ектаў або прыпыненне дзейнасці арганізацый. Гэта дасць магчымасць прадухіліць непрадуманае скарачэнне рабочых месцаў і ліквідацыю сацыяльна значных аб'ектаў, такіх, напрыклад, як банкаматы, пошта, прыпынкі грамадскага транспарту і іншыя.

Стратэгічныя сацыяльна-эканамічныя задачы, якія стаяць перад краінай, і тыя глабальныя выклікі, якія даводзіцца пераадольваць, патрабуюць павышэння якасці кіраўніцкай дзейнасці на ўсіх узроўнях. Таму ўказ істотна пашырае кадравыя паўнамоцтвы мясцовых выканкамаў і іх старшынь у адносінах да дзяржаўных органаў і іншых арганізацый, якія дзейнічаюць на адпаведнай тэрыторыі.

Важнейшай перадумовай паспяховага развіцця цяпер з'яўляецца строгая выканальніцкая дысцыпліна. Таму старшыні рай-, гарвыканкамаў атрымалі права нараўне з выданнем распараджэнняў выносіць пісьмовыя патрабаванні (прадпісанні) аб устараненні парушэнняў заканадаўства і аб прыцягненні да дысцыплінарнай адказнасці работнікаў. Патрабаванні (прадпісанні) могуць быць адрасаваны кіраўнікам ніжэйшых выканкамаў і іншых размешчаных на адпаведнай тэрыторыі арганізацый.

Невыкананне такіх патрабаванняў (прадпісанняў) прывядзе да адміністрацыйнай адказнасці.

Пры гэтым на старшынь выканкамаў базавага ўзроўню ўскладаецца персанальная адказнасць за выдаваемыя распараджэнні, прымаемыя рашэнні аб кадравых узгадненнях, іншыя рашэнні (даручэнні) і выносімыя пісьмовыя патрабаванні (прадпісанні).

Усе гэтыя меры дадуць магчымасць умацаваць уплыў мясцовых органаў улады на сітуацыю ў рэгіёне, павысіць эфектыўнасць работы выканаўчых камітэтаў і іх старшынь, раскрыць рэзервы для якаснага росту ўзроўню жыцця ў краіне.

Указ уступае ў сілу з 1 сакавіка 2025 года.

БЕЛТА