Аляксандр Лукашэнка прапанаваў зрабіць Усебеларускі народны сход канстытуцыйным органам. Што гэта значыць?

Прэзідэнт Беларусі Аляксандр Лукашэнка прапанаваў зрабіць Усебеларускі народны сход канстытуцыйным органам. Пра гэта кіраўнік дзяржавы заявіў сёння на сустрэчы з калектывам Стаўбцоўскай цэнтральнай раённай бальніцы.

«Я так думаю (не ведаю, падтрымаеце вы ці не): Усебеларускі народны сход трэба зрабіць канстытуцыйным органам. Каб быў такі орган, які б кантраляваў галоўныя напрамкі нашага развіцця», – сказаў Аляксандр Лукашэнка.

Паводле слоў Прэзідэнта, парадак Усебеларускага народнага сходу будзе канчаткова сфарміраваны пасля калядных святаў. Само мерапрыемства пройдзе ў канцы студзеня – пачатку лютага.

«Нам трэба зацвердзіць пяцігодку – як мы будзем рухацца ў сацыяльна-эканамічным развіцці. Галоўнае – эканоміка, да чаго мы будзем імкнуцца. Людзі павінны быць зарыентаваныя на пяць гадоў наперад. Другое пытанне – палітыка. Вы самі яго падкінулі: Канстытуцыя і іншае», – адзначыў кіраўнік дзяржавы.

Ён таксама прапанаваў абіраць дэлегатаў на Усебеларускі народны сход на пяцігадовы тэрмін. Працаваць яны будуць на грамадскіх пачатках. Пры гэтым іх ролю і статус значна павысяць: ім будуць падсправаздачныя кіраўнікі парламента, міністры і губернатары.

«Калі мы здымаем некаторыя абавязкі з Прэзідэнта, іх жа трэба кудысьці перадаваць. Ва ўрад і парламент гэтыя паўнамоцтвы не падыходзяць. Куды іх перасоўваць? Трэба шукаць такі орган. А ў нас ёсць Усебеларускі народны сход. Таму некаторыя паўнамоцтвы прыйдзецца перадаць, – лічыць Аляксандр Лукашэнка. – Калі растварыць паўнамоцтвы Прэзідэнта, якія перадаюцца парламенту, ураду, міністрам, губернатарам, будзе поўны бардак, які мы ў сярэдзіне 90-х перажылі. Таму патрэбен орган, які б усіх імгненна стабілізаваў. Ён будзе выступаць ад імя народа, працоўных калектываў. Гэта не паўтор дэпутацкага корпуса: яны як абіраліся, так і будуць. Я прыхільнік таго, каб усё вырашалі вы. Народ павінен вырашаць».

БЕЛТА