Анатоль Ісачанка: мы жывем мірна, спакойна ў сваёй краіне - працуем, ствараем, творым

Урачыстыя мерапрыемствы ў Дзень Незалежнасці Рэспублікі Беларусь на Магілёўшчыне пачаліся з мітынгу на мемарыяльным комплексе «Буйніцкае поле». Удзел у ім узялі старшыня аблвыканкама Анатоль Ісачанка, памочнік Прэзідэнта - інспектар па Магілёўскай вобласці Леанід Мартынюк, старшыня абласнога Савета дэпутатаў Ірына Раінчык, старшыня Магілёўскага гарвыканкама Аляксандр Студнеў, старшыня гарадскога Савета дэпутатаў Максім Гурын.

Да капліцы ад кіраўніцтва абласнога, гарадскога і раённага выканкамаў, абласнога і гарадскога Саветаў дэпутатаў, гарадскіх адміністрацый, прадстаўнікоў Нацыянальнага сходу Рэспублікі Беларусь, гарадоў-пабрацімаў і гарадоў-партнёраў, аб'яднання прафсаюзаў, воінаў-інтэрнацыяналістаў, супрацоўнікаў праваахоўных органаў і вайскоўцаў, МНС, грамадскіх аб'яднанняў, працоўных калектываў, жыхароў горада былі ўскладзены кветкі і вянкі.

Анатоль Ісачанка ў гэты дзень адрасаваў словы віншавання з Днём Незалежнасці жыхарам вобласці, усім беларусам: «На пэўным жыццёвым этапе для кожнага гэтае свята мае сваё значэнне, кожны разумее яго сэнс па-свойму. Але самае галоўнае, што мы жывем мірна, спакойна ў сваёй краіне - працуем, ствараем, творым».

Звяртаючыся да маладога пакалення, губернатар выказаў пажаданне заўсёды памятаць пра гераічны подзвіг свайго народа: «Невыпадкова мы сёння пачынаем святочныя мерапрыемствы на Буйніцкім полі, гэтым знакавым месцы для ўсіх магілёўцаў і не толькі. Мы аддаем даніну памяці нашым бацькам і дзядам, якія заваявалі для нас Перамогу, а па вялікім рахунку - незалежнасць і суверэнітэт. Яны зрабілі ўсё, каб мы засталіся такой міралюбівай, спакойнай, мірнай краінай. Таму задача маладога пакалення захаваць тое, што ў нас ёсць - памяць аб гераічным подзвігу.

Сёння ў свеце, нажаль, неспакойна. Але мы жывем у спакойнай і мірнай краіне, дзякуючы нашаму Прэзідэнту. І мы павінны зрабіць усё, каб захаваць гэта і надалей, для нашых дзяцей і ўнукаў. Усіх са святам, з Днём Незалежнасці! Усяго самага найлепшага!»

Са зваротам ад жыхароў рэгіёну да людзей усёй планеты выступіла ганаровы грамадзянін горада Магілёва Зінаіда Пянькова:

«Мы, жыхары гераічнага Магілёва, знаходзячыся сёння тут, на святой зямлі, багата палітай крывёй, потам і слязамі тысяч нашых продкаў, звяртаемся да ўсёй сусветнай супольнасці. Цяпер адбываецца вельмі складаны перыяд у сусветнай гісторыі. Пагроза новага глабальнага канфлікту як ніколі блізкая. Каланіяльны Захад дзейнічае з імперскім размахам і апантанай прагнасцю да чужых земляў. Выкарыстоўваючы самыя брудныя метады, у нас, у нашчадкаў пераможцаў, адбіраюць нашыя галоўныя святыні – праўду і Перамогу. Захад наўмысна спрабуе сцерці з нашай памяці гістарычную праўду, пасеяць варожасць паміж брацкімі народамі, аб'яднанымі агульным лёсам, і ў канчатковым выніку знішчыць славянскую цывілізацыю. Беларускі народ, які страціў кожнага трэцяга жыхара ў самай страшнай вайне чалавецтва, як ніхто іншы ведае цану свету, найвышэй шануе жыццё, свабоду і незалежнасць.

Тры дзясяткі гадоў таму наша Беларусь стала палітычна і эканамічна незалежнай дзяржавай, тры дзясяткі гадоў мы ідзем па шляху міру і стварэння ў інтарэсах сваіх грамадзян. І ўсе гэтыя гады незалежнасці мы пражылі пад мірным небам. Гэта вынік вялізнай, карпатлівай, штодзённай работы кіраўніка дзяржавы і нашага народа. Таму што беларусы заўсёды, цалкам і шчыра падтрымліваюць міратворчую палітыку, якую праводзяць нашым нацыянальным лідэрам, паважаным Аляксандрам Рыгоравічам Лукашэнкам.

Нам выпала высокая місія - захаваць мір, заваяваны мільёнамі жыццяў герояў, нашых бацькоў і дзядоў. Мы павінны зрабіць усё, што ў нашых сілах і не даць паўтарыцца самай крывавай у сусветнай гісторыі трагедыі. Заклікаю ўсіх людзей - давайце згуртуемся ў імя міру на зямлі і агульнай будучыні нашых дзяцей і ўнукаў. Мы моцныя, толькі калі мы адзіныя, калі мы разам».

Святочную праграму на працягу дня прадоўжаць мерапрыемствы на шматлікіх пляцоўках горада. Завершацца ўрачыстасці канцэртам на плошчы Славы, агульнарэспубліканскай акцыяй «Праспяваем гімн разам!» і феерверкам.

Юлія Таранава, фота Галіны Гаўрыловіч