Анатоль Ісачанка прадставіў новага кіраўніка Асіповіцкага раёна

Старшыня Магілёўскага аблвыканкама Анатоль Ісачанка 25 лістапада 2025 года на пазачарговай сесіі Асіповіцкага раённага Савета дэпутатаў прадставіў актыву раёна новага старшыню райвыканкама Геворга Мелканяна. Яго кандыдатуру на гэту пасаду 20 лістапада 2025 года ўзгадніў Прэзідэнт Беларусі Аляксандр Лукашэнка.

Губернатар падкрэсліў, што Геворг Мелканян - прафесіянал сваёй справы, адказны і добрасумленны кіраўнік.

— За час працы Геворг Гарніковіч зарэкамендаваў сябе кампетэнтным кіраўніком і ўмелым арганізатарам, які добрасумленна адносіцца да выканання ўскладзеных на яго службовых абавязкаў, здольным прымаць канкрэтныя рашэнні і браць на сябе адказнасць, — падкрэсліў Анатоль Міхайлавіч.

Геворг Мелканян, 1989 года нараджэння, ураджэнец Рэспублікі Арменія. Аднак амаль усё жыцьцё пражыў у Рэспубліцы Беларусь. Працоўную дзейнасць выпускнік УА «БДСГА» пачаў у 2012 годзе інжынерам-гідратэхнікам на КМУП «Чачэрскае прадпрыемства меліярацыйных сістэм» Гомельскай вобласці.

З 2016 па 2021 год займаў кіруючыя пасады, у тым ліку і дырэктара ААТ «Перасоўная механізаваная калона - 84 Водбуд» Бабруйскага раёна. У ліпені 2021 года абраны старшынёй Бабруйскай раённай Рады дэпутатаў. Мае досвед працы старшынёй раённага выканаўчага камітэта. У сакавіку 2023 года назначаны на пасаду старшыні Хоцімскага райвыканкама.

Па словах кіраўніка рэгіёну, Геворга Мелканяна адрозніваюць высокая працаздольнасць, патрабавальнасць да сябе і падначаленым, уменне бачыць перспектыву.

- З улікам таго, што Геворг Гарніковіч мае неабходны досвед працы ў сферы дзяржаўнага кіравання, было прынята рашэнне даверыць яму буйнейшы раён, - сказаў губернатар. - Мяркую, што яго прызначэнне на пасаду старшыні Асіповіцкага райвыканкама будзе садзейнічаць дынамічнаму развіццю рэгіёну.

- Упэўнены, што наш раён будзе на слыху і будзе грымець сваімі поспехамі. Я прыкладу ўсе намаганні, якія ад мяне залежаць у гэтым напрамку, - запэўніў Геворг Мелканян. - Вядома, я вельмі спадзяюся на падтрымку калегаў, з якімі мне трэба будзе працаваць. Я знаёмы з Асіповіцкім раёнам не па чутках — бываў тут шматкроць, як па працы, так і ў асабістых паездках. Я ведаю многіх з вас, няхай і не ўсіх, і ўпэўнены, што тут ёсць каманда, з якой можна дасягнуць сур'ёзных вынікаў.

mogilevnews.by