Анатоль Ісачанка: жанчына заўсёды была і застаецца сімвалам жыцця і крыніцай натхнення

Урачысты прыём, прысвечаны Дню жанчын, прайшоў у Палацы культуры вобласці. У святочным мерапрыемстве прынялі ўдзел амаль тры дзясяткі выдатных прадстаўніц розных сфер і прафесій з усёй Магілёўшчыны. Пяці з іх - шматдзетным маці, якія нарадзілі і выхоўвалі па пяць і больш дзяцей - старшыня аблвыканкама Анатоль Ісачанка ўручыў ордэны Маці.

«Жанчына заўсёды была і застаецца сімвалам жыцця і крыніцай натхнення. Менавіта жанчыне кожны з нас абавязаны сваім з'яўленнем на свет. І сёння я хачу асаблівыя словы падзякі сказаць жанчыне-маці, захавальніцы міру і згоды ў сям'і і грамадстве, - адзначыў кіраўнік рэгіёну. — Вы прыносіце ў гэты свет наймацнейшае, чыстае, бескарыслівае пачуццё — безумоўную матчыну любоў.

Быць маці - самая адказная, няпростая, але самая высакародная праца. Выхаваць дзяцей паспяховымі і годнымі людзьмі, сапраўднымі патрыётамі сваёй Радзімы - заслугоўвае шчырай павагі і асобных слоў падзякі».

Анатоль Ісачанка падкрэсліў, што сёння як ніколі намаганні дзяржавы накіраваны на падтрымку сям'і, мацярынства і дзяцінства, і робіцца ўсё магчымае, каб жыццё было спакойным і стабільным.

«Расціць адно дзіця — вялікая радасць. Калі ў сям'і шмат дзяцей - гэта ўжо вялікі дар, вялікая праца і высокая адказнасць, - падзяліўся меркаваннем ён. - У нас на Магілёўшчыне 1,5 тысячы жанчын узнагароджаны ордэнам Маці. Сёлета яшчэ 23 шматдзетныя маці ўдастоены гэтай высокай узнагароды. Пяцёра з іх сёння сярод нас у гэтай зале.

Дзякуючы вам застаюцца непарушнымі такія вечныя каштоўнасці, як вялікая моцная сям'я, вернасць і адданасць. Ваш прыклад варты глыбокай павагі і пераймання. Прыгожыя, моцныя, добрыя, вы ўмееце пастаяць за праўду і шчасце сваіх родных і блізкіх, за будучыню сваіх дзяцей, а значыць - за будучыню нашай краіны».

Анатоль Ісачанка пажадаў прысутным жанчынам, а ў іх асобе – усім прадстаўніцам прыгожага полу Магілёўшчыны, кахання і міру, дабра і моцнага здароўя, дабрабыту сем'ям: «Кожная з вас вартая самых далікатных і ласкавых слоў, кожная заслугоўвае вялікага і светлага кахання, клопату і павагі навакольных. Мы ганарымся вамі – мэтанакіраванымі, дзейнымі, стваральнымі. Са святам!»

Са словам у адказ выступіла адна з узнагароджаных маці, работніца Бярозаўскага сельскага Дома культуры Глускага раёна Наталля Медзвядок: «Ад усіх прысутных жанчын хачу падзякаваць за цёплыя словы і віншаванні, за цудоўнае мерапрыемства. На нас ляжыць вялікая адказнасць за выхаванне будучага пакалення, сапраўдных патрыётаў нашай краіны. Мы адчуваем клопат з боку дзяржавы, бачым, што цэняць нашу працу, важную і неабходную грамадству. Няхай усе сказаныя словы спраўдзяцца, усе мары здзейсняцца і ў сэрцы кожнай жанчыны жыве каханне, а ў кожнай сям'і - пануе ўзаемаразуменне».

Далучыўся да віншаванняў жанчын у гэты дзень і памочнік Прэзідэнта - інспектар па Магілёўскай вобласці Леанід Мартынюк, падкрэсліўшы іх найважнейшую ролю ў грамадстве і падзякаваўшы за захаванне і ўмацаванне духоўных каштоўнасцей, за працу і актыўную жыццёвую пазіцыю. А таксама пажадаўшы дабрабыту ў сем'ях, здароўя, усмешак і светлага вясновага настрою.

Сярод узнагароджаных ордэнам Маці - жыхарка Мсціслаўля Святлана Аўраменка. Жанчына выхоўвае чатырох дачок і сына. Самай старэйшай дзяўчынцы - 16, а малодшаму хлапчуку хутка споўніцца 2 гады. Святлана і сама вырасла ў шматдзетнай сям'і, таму лічыць, што ў вялікай сям'і і заключаецца сапраўднае шчасце.

«Адказнасць, вядома, таксама вялікая, – дзеліцца шматдзетная маці. - Усе нашы дзеці вельмі рознабаковыя, у кожнага свае інтарэсы. Лічу, што вельмі важна - давяраць. Я давяраю ім, яны - мне, інакш ніяк. Абавязкова трэба размаўляць з дзецьмі, паважаць іх меркаванне, прыслухоўвацца і, безумоўна, любіць.

Навіну аб такой высокай узнагародзе я ўспрыняла з хваляваннем. Вельмі перажывала напярэдадні паездкі. Затое дзеці цешыліся, адна з дачок тут жа сама зрабіла і падарыла мне букет. Так што віншаванні пачала прымаць загадзя».

Ордэна Маці за нараджэнне і выхаванне пецярых і больш дзяцей удастоена таксама хатняя гаспадыня з Клічава Галіна Сіводзіна. У сям'і выхоўваецца чатыры сыночка і лапачка-дачка. Старэйшаму дзіцяці - 11 гадоў, малодшаму - 1,5 гады. Таму маму на свята збірала цэлая каманда - дачка дапамагала выбіраць убор, старэйшы сын - круціў бігудзі, а малодшыя - хто як мог падтрымлівалі.

«Ніколі не задумвалася, колькі будзе дзяцей у нашай сям'і. Стаўшы шматдзетнай мамай, ні разу не пашкадавала. Шчырае дзіцячае цяпло - гэта непамернае шчасце, - распавядае Галіна Сіводзіна. - Вядома, такое рашэнне павінна прымацца ўзаемна, бо бацькамі становяцца ўдваіх. Патрэбнасці вырастаюць, і сям'я павінна быць да гэтага гатова.

Але скажу так, калі адчуваеш у сабе біццё новага жыцця - гэта невымоўна, яшчэ больш кранальна, калі бачыш, як дзіця ўпершыню бярэ на рукі тата. У сям'і не дзелім абавязкі, робіцца ўсё сумесна. Па магчымасці заўсёды збіраемся цэлай сям'ёй падтрымаць старэйшых на выступах, наведваем ранішнікі, ездзім на дачу. Дзецям важна адчуваць падтрымку бацькоў, разумець, што яны побач.

Імкнёмся кожнаму дзіцяці надаць увагу, каб яны адчувалі, што кожны застаецца любімым і важным.

Напярэдадні свята ўсім жанчынам жадаю не маркоціцца, каб дзеці былі здаровыя і, вядома, цярпення, кахання і ўсяго самага найлепшага».

Падзялілася ўражаннямі ад святочнай цырымоніі і адна з запрошаных удзельніц, карэспандэнт Круглянскай раённай газеты «Сельскае жыццё» Святлана Хаўратовіч:

«У сучасным грамадстве жанчына не толькі захоўвае ачаг і гадуе дзяцей. Жаночая праца шырока запатрабавана ў вытворчасці, прамысловасці, сельскай гаспадарцы і сацыяльнай сферы, грамадскіх аб'яднаннях. Вельмі прыемна, што наша праца ацэнена і мы ўдзячныя кіраўніцтву вобласці за ўрачыстасць, арганізаваную ў гонар жанчын.

У год, аб'яўлены Прэзідэнтам Беларусі Годам міру і стварэння, хочацца выказаць словы ўдзячнасці за магчымасць жыць, працаваць і гадаваць сваіх дзяцей пад мірным беларускім небам - гэта вельмі дорага, каштоўна і значна. Рада магчымасці пажадаць усім жанчынам здароўя, кахання, міру і працвітання».

Юлія Таранава, фота Галіны Гаўрыловіч