Андрэй Заблоцкі на педканферэнцыі: выхаваўчы складнік выйшаў сёння на першы план

Выхаваўчы складнік адукацыйнага працэсу выйшаў сёння на першы план. Такое меркаванне падчас жнівеньскай педагагічнай канферэнцыі ў Магілёве агучыў начальнік галоўнага ўпраўлення адукацыі Магілёўскага аблвыканкама Андрэй Заблоцкі.

«Сёння на першы план выходзіць выхаваўчы складнік адукацыйнага працэсу, – адзначыў Андрэй Заблоцкі. – Ключавой задачай школы застаецца фарміраванне граматнага і ініцыятыўнага чалавека, гатовага жыць і эфектыўна працаваць у адкрытым інфармацыйным грамадстве. У прыярытэце – выхаванне патрыёта сваёй краіны, які паважае традыцыі і каштоўнасці беларускага народа, з актыўнай грамадзянскай пазіцыяй, здольнага супрацьстаяць выклікам і рызыкам. Для вырашэння гэтых задач будзе максімальна выкарыстоўвацца патэнцыял усёй сацыякультурнай прасторы Магілёўскай вобласці з улікам эфектыўнага міжведамаснага ўзаемадзеяння».

Так, у новым навучальным годзе працягнецца работа па грамадзянска-патрыятычным выхаванні, азнаямленні з матэрыяламі па генацыдзе беларускага народа ў гады Вялікай Айчыннай вайны, вывучэнні гісторыі малой радзімы. Ключавая роля ў гэтым пытанні адведзена рэалізацыі абласнога праекта #Мая_Зямля_Прыдняпроўе. Важнай падзеяй таксама стала адкрыццё музея генацыду беларускага народа ў Магілёўскім эканамічным прафесійна-тэхнічным каледжы, які стаў абавязковым аб’ектам для наведвання навучэнцаў і педагогаў.

«Выхаванне патрыёта – гэта не толькі прывіццё навучэнцам любові да свайго краю, але і разуменне адказнасці за захаванне гістарычнай памяці і гатоўнасць абараняць радзіму, – сказаў Андрэй Заблоцкі. – Фарміраванне гэтых якасцяў – зона асаблівай адказнасці кіраўнікоў па ваенна-патрыятычным выхаванні, стаўкі якіх павінны быць запоўненыя прафесійнымі кадрамі ў поўным аб’ёме».

Немалаважная роля абласнога патрыятычнага цэнтра, які пачаў сваю дзейнасць у Магілёве з 1 верасня мінулага года на базе кадэцкага вучылішча. У новым навучальным годзе стаіць задача, каб яго наведаў кожны юнак-дзесяцікласнік, а ўдзельнікам віртуальнай экскурсіі сталі ўсе навучэнцы сярэдніх і старшых класаў рэгіёна.

БЕЛТА