Асабісты прыём грамадзян правёў старшыня Магілёўскага аблвыканкама Леанід Заяц

Асабісты прыём грамадзян правёў сёння старшыня Магілёўскага аблвыканкама Леанід Заяц. Кіраўнік рэгіёна разгледзеў прыватныя звароты заяўнікаў, якія пры дэталёвым аналізе набывалі рэзанансна-грамадскі характар.  

Напрыклад, фермера з Круглянскага раёна Алега Башарава хвалявала зямельнае пытанне. Яго гаспадарка «Агеньчык», якая спецыялізуецца на авечкагадоўлі, мае ўсяго 50 га зямлі. Між тым колькасць авечак ўжо дасягнула 500 галоў. У найбліжэйшы час мяркуецца значнае павелічэнне пагалоўя за кошт маладняку. Натуральна, патрабуюцца новыя шматгектарныя плошчы для пашырэння кармавой базы. Але пытанне з іх вылучэннем зацягнулася: па суседстве з прыватнай гаспадаркай размешчана малочна-таварная ферма калектыўнай сельскагаспадарчай арганізацыі. І ў яе, вядома, свае інтарэсы на зямлю. З улікам перспектыўнасці і значнасці развіцця авечкагадоўчай галіны ў рэспубліцы заяўніку былі прапанаваны ўзаемапрымальныя для зацікаўленых бакоў варыянты вырашэння праблемы.

Аргументаваныя адказы непасрэдна падчас прыёму былі дадзены і іншым заяўнікам, іх звароты ўзяты на кантроль.

Па матэрыяле mogilevnews.by