Астанкі 22 чырвонаармейцаў і ўстаноўленае імя: у Асіповіцкім раёне завяршылася пошукавая вахта

Астанкі 22 байцоў Чырвонай арміі і адно ўстаноўленае імя – у Асіповіцкім раёне завяршылася пошукавая экспедыцыя «Рэйд 2022», якую праводзіў Магілёўскі абласны гісторыка-патрыятычны пошукавы клуб «Віккру». Пра гэта паведаміла метадыст ДУДА «Магілёўскі абласны цэнтр творчасці» і начальнік штаба пошукавага клуба Святлана Барысенка.

Пошукавыя работы ў Асіповіцкім раёне праходзілі ў раёне населеных пунктаў Ялізава, Ліпень, Чучча і ўрочышча Барок. Паралельна ў раёне вяліся разведвальныя работы. «Вынікам пошукавай экспедыцыі стала выяўленне 22 астанкаў чырвонаармейцаў. Акрамя гэтага, былі знойдзены тры медальёны ў раёне Барок і ў лясным масіве каля вёсцы Чучча. Адзін з медальёнаў быў пашкоджаны, унутры яго нічога не захавалася. Дзякуючы яшчэ аднаму ўдалося ўстанавіць імя салдата – гэта быў Павел Фёдаравіч Конанаў з вёскі Мавурына Данілаўскага раёна Яраслаўскай вобласці, 1917 года нараджэння. Ён ваяваў у 214 паветрана-дэсантнай брыгадзе», – распавяла Святлана Барысенка.

У лясным масіве ў Чуччы пошукавікі знайшлі астанкі лейтэнанта, які хутчэй за ўсё служыў у конна-механізаваным падраздзяленні. Сярод выяўленых рэчаў былі кавалерыйскія шпоры і медальён. «На жаль, гэты салдат застанецца невядомым. Як аказалася, укладыш у яго медальёне не быў запоўнены, – адзначыла яна. – Верагодна, ён не паспеў гэтага зрабіць ці не стаў. Таму што ў салдат існавалі забабоны, што варта запоўніць укладыш у медальёне, як загінеш у першым жа баі. Выяўленне такіх медальёнаў – не рэдкасць, але вельмі вялікае расчараванне для ўсіх пошукавікаў. Таму што гэты салдат так і не вернецца да сваіх родных, хаця мы зрабілі ўсё для таго, каб вярнуць яшчэ аднаго байца з палёў бітваў Вялікай Айчыннай вайны».

Удзельнікамі экспедыцыі сталі вопытныя пошукавікі клуба «Віккру», вучні ялізаўскай школы і вайскоўцы 52-га спецыялізаванага батальёна Міністэрства абароны. Экспедыцыя праходзіла па месцах жорсткіх баёў 1941-га і 1944-га гадоў.

Цяпер у працы віккруўцаў будзе невялікі перапынак. А ў верасні пошукавікі пачнуць новую вахту ў Слаўгарадскім раёне. «Акрамя гэтага, у кастрычніку можа дадацца і Шклоўскі раён. У нас ёсць добрыя напрацоўкі па гэтай мясцовасці», – падкрэсліла Святлана Барысенка.

БЕЛТА