Аўтапрабег у гонар Дня Перамогі арганізуюць у Бабруйску 9 мая

Аўтапрабег у гонар Дня Перамогі арганізуюць у Бабруйску 9 мая. Ужо не першы год дзясяткі жыхароў горада на Бярэзіне адзначаюць свята за рулём тэматычна аформленых аўтамабіляў.

Стартуе аўтапрабег на задняй паркоўцы «Бабруйск-Арэны» (вул. Апермана). Далей калона пройдзе ад вуліцы Карбышава да «Кургана Славы» ў в. Сычкава. Тут бабруйчане разгорнуць самы вялікі сцяг Беларусі ў Магілёўскай вобласці, ускладуць кветкі да мемарыяльнага комплексу, запусцяць у неба паветраныя шары. Пасля калона адправіцца ў горад і даедзе да помніка воінам-вызваліцелям.

Акрамя таго, сярод удзельнікаў аўтапрабегу правядуць конкурс. Афармленне будуць ацэньваць у дзвюх намінацыях: «Савецкая» (удзельнічаюць машыны савецкай эпохі) і «Сучасная» (спаборнічаюць аўто 1990-2019 гг.). Пераможцаў спаборніцтва чакаюць прызы ад арганізатараў.