Банк БелВЭБ прафінансуе пастаўкі высокатэхналагічнай прадукцыі для Магілёўліфтмаша на 250 млн расійскіх рублёў

ААТ «Банк БелВЭБ» прафінансуе для ААТ «Магілёўліфтмаш» пастаўкі высокатэхналагічнай прадукцыі (сталь ацынкаваная, ліфтавы складнік) з Расіі на суму 250 млн расійскіх рублёў.

Крэдытная падтрымка Банка БелВЭБ абумоўлена патрэбай прадпрыемства ў гнуткіх механізмах фінансавання бягучай дзейнасці для разлікаў з расійскімі пастаўшчыкамі. Такое фінансаванне забяспечвае бесперапынны вытворчы працэс па выпуску асноўнага віду прадукцыі – ліфтаў, запатрабаваных на ўнутраным і знешнім рынках.

Засваенне рэсурсаў дазволіць прадпрыемству больш эфектыўна выкарыстоўваць абаротныя сродкі і працягваць супрацоўніцтва з буйнымі расійскімі вытворцамі на больш прывабных умовах.

Магілёўліфтмаш супрацоўнічае з Банкам БелВЭБ са снежня 2010 года. Асноўныя напрамкі сумеснай дзейнасці – размяшчэнне актываў, арганізацыя фінансавання паставак прадукцыі з Расіі.

«Банк БелВЭБ і Магілёўліфтмаш звязваюць даўнія канструктыўныя дзелавыя адносіны. Усе гэтыя гады наш банк імкнецца быць для гэтага важнага для краіны прадпрыемства кампетэнтным партнёрам пры правядзенні фінансавых аперацый. У цэлым схільнасць да высокіх стандартаў кліенцкага сэрвісу ў спалучэнні з прымяненнем сучасных інтэрнэт-тэхналогій дазваляюць Банку БелВЭБ быць на рынку адным з лідараў у галіне абслугоўвання карпаратыўных кліентаў» – адзначыў старшыня праўлення ААТ «Банк БелВЭБ» Васіль Мацюшэўскі.

ААТ «Магілёўліфтмаш» з’яўляецца адзіным у Рэспубліцы прадпрыемствам, якое вырабляе ліфтавае абсталяванне: шырокую гаму пасажырскіх, грузавых ліфтаў (асвоены выпуск каля 147 базавых мадэляў). Вырабляе запасныя часткі для ліфтавага абсталявання і запасныя часткі для рамонту, замены і мадэрнізацыі фізічна зношаных ліфтаў, эскалатары папавярховыя, пад’ёмнікі мачтавыя будаўнічыя грузапасажырскія, пад’ёмнікі для маламабільных груп насельніцтва, паркоўку ротарную, камплекты абсталявання для сельскай гаспадаркі, а таксама няпрофільнае абсталяванне і спажывецкія тавары (машыны дрэваапрацоўчыя, лябёдкі сельскагаспадарчыя і да т.п.).

Удзельная вага расійскіх матэрыялаў у агульным аб’ёме вытворчасці складае 60-70%. Асноўнымі пастаўшчыкамі выступаюць ПАТ «Наваліпецкі металургічны камбінат», г. Ліпецк (метал) і АТ «Амутнінскі металургічны завод», г. Амутнінск (накіроўвальныя).

Асноўнымі рынкамі збыту прадукцыі з’яўляюцца Расійская Федэрацыя, Рэспубліка Беларусь, Украіна, Казахстан. Пастаўкі ліфтавага абсталявання ажыццяўляліся ва Узбекістан, Літву, Эстонію, Грузію, Румынію і іншыя краіны.

БЕЛТА