Беларускі дзяржаўны ўніверсітэт харчовых і хімічных тэхналогій рыхтуецца да прыёму мэтавікоў

Беларускі дзяржаўны ўніверсітэт харчовых і хімічных тэхналогій рыхтуецца да прыёму мэтавікоў. Як і ў папярэднія гады, першымі ў БДУТ пададуць дакументы тыя, хто паступае на ўмовах мэтавай формы падрыхтоўкі, расказалі ва ўніверсітэце. Прыём дакументаў ад абітурыентаў гэтай катэгорыі, а таксама сумоўі з імі правядуць з 27 чэрвеня па 2 ліпеня, уступныя іспыты пройдуць з 4 па 10 ліпеня, залічэнне - па 12 ліпеня.

- Для нашага ўніверсітэта квота ў гэтым годзе складае 110 мэтавых месцаў на сем спецыяльнасцяў, - распавёў адказны сакратар прыёмнай камісіі БДУТ Юрый Грабенцоў. - Шэсць з гэтых спецыяльнасцяў уваходзяць у пералік найбольш запатрабаваных эканомікай, конкурс сярод мэтавікоў па іх не абавязковы, няма таксама патрабаванняў да сярэдняга бала атэстата.

Як адзначылі ва ўніверсітэце, абітурыенты, якія паступаюць па мэтавым накіраванні, здаюць толькі адзін унутраны вусны экзамен па вучэбным прадмеце, які адпавядае першаму профільнаму для выбранай спецыяльнасці. Пры гэтым выпускнікі класаў або груп аграрнай накіраванасці, якія маюць адзнакі не ніжэйшыя за 6 балаў па хіміі і матэматыцы, могуць паступіць без экзаменаў на спецыяльнасці «Вытворчасць прадуктаў харчавання з расліннай сыравіны» і «Вытворчасць прадуктаў харчавання з жывёльнай сыравіны» пры наяўнасці мэтавага дагавора і паспяховага праходжання сумоўя.

Прыём вядзецца па асобным конкурсе сярод абітурыентаў, якія заключылі дагавор з прадпрыемствам-заказчыкам.

Найбольшым попытам у заказчыкаў карыстаюцца традыцыйныя спецыяльнасці БДУТ.

Ад вядучых прадпрыемстваў харчовай галіны краіны - мясакамбінатаў, малаказаводаў, кандытарскіх фабрык - ужо паступіла 43 заяўкі на спецыяльнасць «Вытворчасць прадуктаў харчавання з жывёльнай сыравіны» і 30 заявак на «Вытворчасць прадуктаў харчавання з расліннай сыравіны».

У ВНУ нагадалі, што паступленне па мэтавым накіраванні - гэта ўпэўненасць у будучыні. На працягу ўсяго навучання студэнт будзе звязаны з канкрэтным прадпрыемствам (праходжанне практыкі, выкананне курсавых і дыпломных праектаў). Такі падыход скарачае тэрмін адаптацыі маладога спецыяліста на першым працоўным месцы. Таксама многія прадпрыемствы даплачваюць надбаўкі да стыпендый студэнтам-мэтавікам.

Каб дапамагчы абітурыентам вызначыцца з выбарам, на сайце Міністэрства адукацыі размешчана інтэрактыўная карта, тут можна знайсці ВНУ і заказчыкаў, спецыяльнасці і кантакты арганізацый для атрымання інфармацыі і заключэння дагавораў.

СБ