Больш за 100 чалавек аб'яднала абласная спартакіяда «Спорт для ўсіх» у Магілёве

Больш за 100 чалавек з ліку падапечных дамоў-інтэрнатаў для састарэлых і інвалідаў, а таксама з дамоў-інтэрнатаў для дзяцей-інвалідаў з асаблівасцямі псіхафізічнага развіцця сталі ўдзельнікамі абласной спартакіяды «Спорт для ўсіх» у спартыўным комплексе «Алімпіец» у Магілёве.

У абласны цэнтр прыехалі каманды з 9 дамоў-інтэрнатаў рэгіёна. Як расказалі спартсмены, яны сур'ёзна рыхтаваліся да спаборніцтваў і з нецярпеннем чакалі гэтага вялікага свята. «Мы прадстаўляем Хоцімскі псіханеўралагічны дом-інтэрнат для састарэлых і інвалідаў, у нашай камандзе 11 чалавек. Апошнія спаборніцтвы праходзілі ў 2019 годзе, тады мы занялі трэцяе месца ў агульнакамандным заліку. А потым прыйшла пандэмія, і нашае спартыўнае свята перанеслі. Але мы з вялікім нецярпеннем чакалі спартакіяду і рады быць тут сёння, - сказаў удзельнік каманды з Хоцімскага раёна Ігар Бондараў. - Спартакіяда дае магчымасць паказаць спартыўныя навыкі, бо ў доме-інтэрнаце мы падтрымліваем спартыўную форму, займаемся фізічнай працай. Кожны - па меры сіл і здароўя. Вядома, гэта спаборніцтвы, і тут перамагае мацнейшы, але ж гэта яшчэ і задавальненне ад магчымасці пагутарыць са старымі сябрамі, пазнаёміцца з новымі людзьмі».

Ганна Шахаўцова прыехала ў Магілёў разам з камандай з Чавускага псіханеўралагічнага дома-інтэрната для састарэлых і інвалідаў. Яна будзе пераадольваць бегавую дыстанцыю. «Я раней таксама ўдзельнічала ў такіх спаборніцтвах, таму для мяне гэта нешта новае. Каб прадстаўляць наш дом-інтэрнат, мы ўсё трэніраваліся, у нас ёсць усё неабходнае для заняткаў спортам, а яшчэ ездзілі ў ФАК, - расказала яна. - Я люблю займацца спортам і імкнуся падтрымліваць форму, таму што заняткі фізкультурай даюць больш сіл, сыходзяць усе дрэнныя думкі. У Магілёў мы прыехалі з добрым настроем і жаданнем перамагаць, свайго мы дакладна не выпусцім».

Удзельнікаў спартакіяды прывітала намеснік старшыні камітэта па працы, занятасці і сацыяльнай абароне Магілёўскага аблвыканкама Святлана Сцяпанава. «Спартакіяда - традыцыйнае спартыўнае мерапрыемства, якое праходзіла раз на два гады да пандэміі каранавіруса. Таму быў зроблены перапынак. Але я спадзяюся, што мы адновім гэтую традыцыю і наступную спартакіяду правядзем у 2025 годзе, - распавяла яна. - Падапечныя дамоў-інтэрнатаў нашага рэгіёну актыўна падключаюцца да спаборніцтваў. Пакуль быў перапынак, мы ўвесь час чулі просьбы зноў сабраць усіх разам і правесці абласную спартакіяду. Сёння тут шмат людзей - больш за 100 чалавек, што кажа аб тым, што спартакіяда не губляе сваёй актуальнасці». Паводле яе слоў, усе этапы спаборніцтваў адаптаваны для людзей пажылога ўзросту, а таксама тых, хто мае абмежаваныя магчымасці здароўя. Гэта шашкі, міні-футбол, настольны тэніс, лёгкая атлетыка, эстафета, бочэ і жульбак.

Як адзначыў намеснік начальніка ўпраўлення спорту і турызму Магілёўскага аблвыканкама Вадзім Брэжазінскі, спартакіяда выконвае адразу некалькі важных задач. «Мы сабралі вельмі вялікую колькасць удзельнікаў, і спартакіяда дае магчымасць кожнаму акунуцца ў атмасферу спартыўнага спаборніцтва, сяброўства, падтрымкі і ўзаемаразумення. Тут падапечныя дамоў-інтэрнатаў змогуць пагутарыць, знайсці новых сяброў, адцягнуцца ад штодзённасці і зарадзіцца станоўчымі эмоцыямі, - падкрэсліў ён. - Спаборны момант таксама ніхто не выключае. Мы ўбачылі сапраўдную волю да перамогі і спартовую рызыку».

БЕЛТА