Больш за 2 тыс. удзельнікаў сабраў у Магілёве флэшмоб «Мы разам»

Больш за 2 тыс. удзельнікаў сабраў флэшмоб «Мы разам» у Магілёве. Акцыя праходзіла на плошчы Славы ў абласным цэнтры.

Тут сабраліся прадстаўнікі розных прафесій і ўзростаў: УУС, пракуратура, Следчы камітэт, курсанты, кадэты, моладзь і проста неабыякавыя жыхары горада.

«У нас сёння буйнамаштабны флэшмоб «Мы разам». Мы хочам паказаць усяму грамадству, што нашы людзі гатовы ў любы момант падтрымаць нашу краіну і заўсёды прыйсці на дапамогу, – расказала начальнік упраўлення ідэалагічнай работы галоўнага ўпраўлення ідэалагічнай работы і па справах моладзі Магілёўскага аблвыканкама Наталля Дашкова. – І сёння колькасць тых, хто адгукнуўся, паказвае, што ўсе мы адзіныя. Менавіта так і называецца наша акцыя».

Сёння на вул. Першамайскай разгарнулі 100-метровы беларускі сцяг. Пасля таго як галоўны сімвал краіны пранеслі па вуліцы, ён стаў часткай самога флэш-мобу: каля 700 чалавек склалі адзіную кампазіцыю: ля палатна выстраіліся ў слова «Мы». «Сёння якраз будзе праводзіцца адпраўка прызыўнікоў на тэрміновую вайсковую службу: ва ўрачыстай абстаноўцы служыць адправіцца каля 100 чалавек, – адзначыла Наталля Дашкова. – І яны таксама павінны бачыць, што мы іх падтрымліваем, каб ім не страшна было. Я, як мама будучага прызыўніка, які ўжо на гэтым тыдні адправіцца служыць, таксама перажываю. І мне здаецца, наша акцыя будзе хлопцам прыемная».

Адным з удзельнікаў флэшмобу стаў студэнт 2-га курса МДУ імя А. А. Куляшова Дзмітрый Куратаў. Ён адзначыў, што моладзь хоча жыць у спакойнай і мірнай краіне. «Удзелам у такім вялікім флэшмобе мы хочам выказаць сваю салідарнасць, паказаць, што мы насамрэч разам, – адзначыў малады чалавек. – Разам мы можам многае, па адным мы не такія моцныя. Я люблю ўдзельнічаць у падобных мерапрыемствах, гэта вельмі натхняе».

БЕЛТА, ТРК «Магілёў»