Больш за 20 дэкаратыўных навагодніх скульптур устанавілі ў цэнтры Магілёва

У цэнтры Магілёва размясцілі больш за 20 дэкаратыўных навагодніх скульптур, створаных удзельнікамі абласнога конкурсу «Навагодняя фантазія». Пра гэта расказалі ў Магілёўскім абласным метадычным цэнтры народнай творчасці і культурна-асветнай работы.

Конкурс праводзіцца ўжо трэці год запар і кожны раз збірае на адной пляцоўцы найлепшыя работы майстроў дэкаратыўна-прыкладной творчасці. Удзельнікамі творчага спаборніцтва традыцыйна становяцца асобныя ўмельцы і калектывы, прадстаўнікі клубных фарміраванняў, спецыялісты дамоў і цэнтраў рамёстваў. Самай юнай удзельніцы конкурсу Ксеніі Калесневай з Дрыбінскага раёна ўсяго 12 гадоў, яна вырабіла «Дракона» ў тэхніцы пап'е-машэ.

Сёлета ўдзельнікі спаборнічаюць па трох намінацыях: «Лепшая навагодняя ёлка», «Лепшая навагодняя кампазіцыя» і «Лепшы сімвал года». Усяго на конкурс прадстаўлены 23 работы, сярод якіх можна ўбачыць навагоднія ёлкі, святочныя ўпрыгожанні, кампазіцыі з лазы, саломы, дрэва і іншых матэрыялаў. Напрыклад, Мсціслаўскі раён вырабіў ёлку з ільнянога каната, упрыгожыўшы яе сняжынкамі з саломы і льнянымі бантамі. Макушка навагодняй прыгажуні вянчае шапка Дзеда Мароза.

Навагоднюю кампазіцыю ў выглядзе аленя і саней з падарункамі зрабілі майстры Асіповіцкага раёна, ёлку з драўляных спілоў прадставіў Хоцімскі раён. Клімавіцкі раён для конкурсу падрыхтаваў драўляную арт-ёлку, якая імітуе саламянага павука. Сімвал 2024 года ад Магілёўскага раёна - вялікі цмок - выкананы са скуры. Кампазіцыя ўпрыгожана шарамі і вырабамі з прыродных матэрыялаў.

Пры ацэнцы конкурсных работ будуць улічвацца арыгінальнасць аўтарскай задумкі, складанасць афармлення і мастацкі ўзровень вырабаў, умелае і гарманічнае спалучэнне народных традыцый і творчай індывідуальнасці, адпаведнасць конкурснай работы навагодняй тэматыцы. Пераможцы будуць узнагароджаны дыпломамі I, II, III ступеней.

Абласны конкурс дэкаратыўна-прыкладнога мастацтва «Навагодняя фантазія» праходзіць да 29 снежня 2023 года. Самі конкурсныя работы будуць радаваць на адкрытай пляцоўцы магіляўчан і гасцей горада да 14 студзеня 2024 года.

БЕЛТА