Больш за 35 пагадненняў падпісалі кіраўнікі ўстаноў адукацыі рэгіёну падчас Дзён Магілёўскай вобласці ў Маскве

У Маскве працягваюцца Дні Магілёўскай вобласці. З пачатку іх правядзення ў выставачна-гандлёвым павільёне «Беларусь» на ВДНГ свае напрацоўкі і творчыя прэзентацыі гасцям і жыхарам расійскай сталіцы прадставілі многія ўстановы і арганізацыі Прыдняпроўскага краю.

Пабывалі на выставе і кіраўнікі ўстаноў адукацыі Магілёўшчыны на чале з рэктарам УА «Магілёўскі дзяржаўны абласны інстытут развіцця адукацыі» Міхаілам Жудро.

З 4 па 6 красавіка яны сталі ўдзельнікамі мерапрыемстваў па прэзентацыі сістэмы адукацыі нашага рэгіёна. Наведвальнікам выставы быў прадэманстраваны відэаролік, які расказвае аб узроўнях і ступенях адукацыі ў нашай краіне і на Магілёўшчыне ў прыватнасці, таксама прапаноўваліся рэкламныя, прэзентацыйныя і прафарыентацыйныя буклеты.

Але, мабыць, важным і прадуктыўным момантам знаходжання на маскоўскай зямлі дэлегацыі нашай вобласці стала наведванне некаторых адукацыйных устаноў і прафесійных адукацыйных арганізацый сталіцы і Падмаскоўя.

Прадстаўнікі Магілёўшчыны азнаёміліся з праграмамі навучання і тэхнічнымі магчымасцямі для павышэння кваліфікацыі і перападрыхтоўкі педагогаў, убачылі прыклады інтэграцыі ў адукацыйны працэс мадэляў навучання па нацыянальных (рэгіянальных) патрабаваннях і ўдалай рэалізацыі праектаў у сферы адукацыі Падмаскоўя. Вынікам гэтых наведванняў, а таксама сустрэч з калегамі з Расійскай Федэрацыі падпісанне больш за 35 пагадненняў аб супрацоўніцтве.

mogilevnews.by