Больш за 500 кг цукерак раздадуць удзельнікам абласной прафсаюзнай ёлкі

Паўтоны цукерак раздадуць удзельнікам абласной прафсаюзнай ёлкі ў якасці салодкага навагодняга падарунка. Мерапрыемства адбудзецца 27 снежня ў Палацы культуры вобласці ў межах традыцыйнай дабрачыннай акцыі «Прафсаюзы – дзецям». Дзяцей чакае займальнае прадстаўленне са Снягуркай і Дзедам Марозам, а таксама навагодняя казка.

У гэтым годзе гасцямі ёлкі, якая праводзіцца ўжо больш за дзесяць гадоў, стане больш за 500 хлопчыкаў і дзяўчынак – пераважна дзеці са шматдзетных і малазабяспечаных сем’яў, дзеці-інваліды, выхаванцы замацаваных за абласным аб’яднаннем прафсаюзаў сацыяльных прытулкаў і дзіцячых устаноў адукацыі інтэрнатнага тыпу. Кожнае дзіця атрымае кілаграмовы падарунак.

Таксама напярэдадні навагодніх і калядных святаў прафсаюзы наведаюць і акажуць бязвыплатную дапамогу сваім падшэфным установам ва ўмацаванні матэрыяльна-тэхнічнай базы, закупцы іх выхаванцам прысмакаў і навагодніх падарункаў, арганізацыі паездак на навагоднія казкі і паказы.

«Прафсаюзы ніколі не стаялі ў баку ад пытанняў, якія тычацца дапамогі дзецям, – заўважылі ў абласным аб’яднанні прафсаюзаў. – Пацвярджэннем таму служыць Рэспубліканская дабрачынная акцыя «Прафсаюзы – дзецям». Яна носіць круглагодны характар і прадугледжвае аказанне рэальнай спонсарскай дапамогі дзецям і асобным катэгорыям сем’яў да навагодніх і калядных святаў, дня ведаў, 1 Мая і г.д.».

Толькі ў 2017 годзе агульная сума аказанай дзецям дапамогі склала больш за Br850 тыс. і яе памер пастаянна павялічваецца. Напрыклад, на падрыхтоўку дзяцей да школы ў бягучым годзе прафсаюзныя арганізацыі вобласці выдзелілі амаль Br570 тыс., а гэта на 60% больш у параўнанні з мінулым.