Больш за 500 студэнтаў-першакурснікаў пачалі вучобу ў Беларуска-Расійскім універсітэце

Больш за 500 студэнтаў-першакурснікаў дзённай формы адукацыі пачалі вучобу ў Беларуска-Расійскім універсітэце. Пра гэта паведаміў рэктар універсітэта Міхаіл Лусцянкоў пасля ўрачыстай лінейкі.

«Наша ВНУ па-свойму ўнікальная ў рэспубліцы – двойчы дзяржаўная. Навучанне тут праходзіць па вучэбных праграмах Беларусі і Расіі. У гэтым годзе ў нас добры набор студэнтаў па двух кірунках, – расказаў рэктар універсітэта. – Сёння да нас прыйшло больш за 500 студэнтаў-першакурснікаў дзённай формы адукацыі. Студэнты добрыя, нам застаецца толькі якасна выконваць сваю працу, а ім – атрымліваць новыя веды».

Павіншаваць студэнтаў са святам прыехаў намеснік старшыні Магілёўскага аблвыканкама Руслан Страхар: «Дзень ведаў – заўсёды хвалюючы дзень. Бо выбар будучай прафесіі – гэта іх першы свядомы крок да дарослага жыцця. Важна, каб усе вышэйшыя ўстановы рыхтавалі якасных спецыялістаў і злучалі ў сваёй працы навуку, навучанне і вытворчасць у розных галінах. Ад таго, кім студэнты стануць, якую адукацыю яны атрымаюць, залежыць будучыня нашай краіны. Я ўпэўнены, што будучыня ў нас надзейная і светлая».

Як расказала першакурсніца Вікторыя Рудніцкая, для яе сёння вельмі важны дзень. «Сёння ўсё вельмі хвалююча, але я ўпэўненая, што ўсё будзе выдатна. Мая мама вучылася ў гэтым універсітэце і шмат расказвала пра яго: моцныя выкладчыкі, жыццё ВНУ насычана не толькі вучобай, але і рознымі творчымі мерапрыемствамі і алімпіядамі. Я хачу стаць годным студэнтам гэтай ВНУ. І ўсім першакурснікам я хачу пажадаць упэўненасці ў сабе», – сказала дзяўчына.

У Беларуска-Расійскім універсітэце з гэтага года дадаліся новыя спецыяльнасці. «Мы паступова перастаём быць толькі тэхніка-эканамічнай ВНУ. У гэтым годзе пачалі рыхтаваць гуманітарыяў па напрамку «Замежнае рэгіёназнаўства». У наступным годзе плануем адкрыць спецыяльнасці фізіка-матэматычнай накіраванасці. Мы штогод адкрываем дзве-тры новыя спецыяльнасці. Гэта сведчыць аб тым, што наша ўстанова дынамічна развіваецца», – расказаў Міхаіл Лусцянкоў.

На першай ступені адукацыі ў Беларуска-Расійскім універсітэце зараз адкрыта 26 спецыяльнасцей.

БЕЛТА, фота ўласные