Больш за 5,5 тыс. хлопчыкаў і дзяўчынак плануюць працаўладкаваць у студатрады сёлета ў Магілёўскай вобласці

Больш за 5,5 тыс. хлопчыкаў і дзяўчынак плануюць працаўладкаваць у студатрады сёлета ў Магілёўскай вобласці. Пра гэта расказаў камісар абласнога штаба студэнцкіх атрадаў Магілёўскай вобласці Віктар Радоўскі падчас промапраекта «Выбіраем студатрад» у Магілёўскім дзяржаўным універсітэце ім. А.А.Куляшова.

«У бягучым годзе тэрытарыяльнымі штабамі студэнцкіх атрадаў БРСМ запланавана працаўладкаванне больш як 5,5 тыс. дзяцей ва ўзросце ад 14 гадоў. У мінулым годзе ў вобласці было створана 567 студэнцкіх атрадаў, - адзначыў Віктар Радоўскі. - Да нашага руху актыўна далучаюцца не толькі студэнты, а таксама навучэнцы школ і каледжаў. Для іх ствараюцца ўсе неабходныя ўмовы для працы, сумеснага актыўнага і творчага адпачынку».

Сёння студэнтам расказалі пра тое, як і дзе можна папрацаваць падчас канікулаў і як стаць часткай вялікай студатрадаўскай сям'і. Акрамя таго, у ВНУ пачалі стварэнне баз даных жадаючых працаўладкавацца.

Як адзначыў Віктар Радоўскі, з кожным годам у рэгіёне расце колькасць хлопчыкаў і дзяўчынак, якія далучаюцца да студатрадаў. Бо гэта не толькі магчымасць зарабіць, але і ўнесці свой уклад у рэалізацыю значных для вобласці і краіны праектаў.

БЕЛТА