Больш за 800 тысяч рублёў матэрыяльнай дапамогі накіравана на падрыхтоўку дзяцей да школы ў Магілёўскай вобласці

Прафсаюзы рэгіёну актыўна ўключаны ў працэс падрыхтоўкі школьнікаў да 1 верасня.

Матэрыяльную дапамогу ўжо атрымалі 4658 сябраў прафсаюзаў. Яна прызначана для збору да школы 7730 вучняў. З кожным днём гэтыя лічбы істотна растуць. У падрыхтоўцы дзяцей да новага навучальнага года задзейнічаны як сродкі наймальнікаў, так і галіновых прафсаюзаў.

Так, члены прафсаюзаў банкаўскіх устаноў вобласці атрымліваюць грошы на кожнае дзіця школьнага ўзросту ў межах сум, прапісаных у калектыўных дагаворах. Напрыклад, работнікі «Беларусбанка» ўжо атрымалі па 210 рублёў на кожнага школьніка. Акрамя таго, галіновы прафсаюз падрыхтаваў для першакласнікаў спецыяльныя школьныя наборы коштам па 100 рублёў кожны.

– Наш прафсаюз імкнецца аказаць максімальна магчымую дапамогу, ахапіць пры падрыхтоўцы да новага навучальнага года як мага больш дзяцей, – расказвае старшыня Магілёўскай абласной арганізацыі Беларускага прафсаюза банкаўскіх і фінансавых работнікаў Вячаслаў Дзянісаў. - Напрыклад, нашы прафкамы ўзялі шэфства над 8 інтэрнатнымі ўстановамі. Для іх выхаванцаў мы збіраем добраахвотныя ўнёскі нашых актыўных сябраў прафсаюза. Ніякіх фіксаваных сум - кожны ўдзельнічае ў гэтай акцыі зыходзячы са сваіх магчымасцяў. Я вельмі ўдзячны ўсім, хто адгукнуўся.

- У большасці выпадкаў наймальнікі знаходзяць магчымасць аказаць неабходную дапамогу сваім работнікам, у якіх ёсць дзеці школьнага ўзросту. У арганізацыях аказваецца дапамога ў набыцці школьных прылад, канцылярскіх тавараў, уручаюцца падарункавыя сертыфікаты для куплі неабходных школьных тавараў, - адзначае старшыня Магілёўскага абласнога аб'яднання прафсаюзаў Уладзімір Цумараў. - Федэрацыя прафсаюзаў з 2002 года на пастаяннай аснове праводзіць дабрачынную акцыю «Прафсаюзы – дзецям». У яе рамках аказваецца падтрымка не толькі работнікам прадпрыемстваў, але і дзіцячым дамам, школам-інтэрнатам, сацыяльным прытулкам, а таксама дзецям са шматдзетных і малазабяспечаных сем'яў і дзецям-інвалідам. Гэта нашая агульная справа. Бо чужых дзяцей не бывае.

Напярэдадні пачатку навучальнага года прафкамы шэрагу прадпрыемстваў арганізуюць святы для будучых першакласнікаў: яркія тэатралізаваныя паказы, конкурсныя, забаўляльныя, экскурсійныя праграмы з уручэннем дзецям доўгачаканых падарункаў - партфеляў, набораў для творчасці, школьных прылад, пазнавальных гульняў і многага іншага.

mogilev.1prof.by