Больш за Br 250 тыс. накіруюць да канца года ў Магілёве на рамонт інтэрнатаў. Гэта будуць акумуляваныя сродкі, якія паступілі ад жыхароў на кошт плацяжоў за пражыванне. Пра гэта паведаміў генеральны дырэктар Упраўлення камунальных прадпрыемстваў Магілёва Андрэй Кіблоў.

«З гэтага года мы маем намер самым сур’ёзным чынам узяцца за рамонт інтэрнатаў, зрабіць пражыванне ў іх больш камфортным, – адзначыў Андрэй Кіблоў. – Дастаткова сказаць, што толькі сёлета ва ўсіх 54 інтэрнатах, якія знаходзяцца на балансе нашых жыллёва-эксплуатацыйных арганізацый, будуць заменены няспраўныя электрапліты, адрамантаваны дахі. А на шэрагу аб’ектаў плануем зрабіць бягучы і комплексны рамонт».

Ужо адрамантавалі інтэрнаты №10 і 11 ЖРЭУ Ленінскага раёна па вуліцы Крупскай. Пасля звароту іх жыхароў на прамую лінію да старшыні аблвыканкама Леаніда Зайца ён асабіста пабываў на аб’ектах, вывучыў сітуацыю і ўзяў яе на кантроль. Пасля гэтага прайшло ўсяго крыху больш за месяц, і гэтыя інтэрнаты сур’ёзна змяніліся.

«Цяпер нашы інтэрнаты сталі ўзорнымі, – дзеліцца ўражаннямі старшыня савета інтэрната пенсіянерка Яніна Лісоўская. – У нас адбыліся глабальныя перамены. Прыведзены ў парадак усе кухні агульнага карыстання з заменай, дзе патрабавалася, сантэхнічнага абсталявання, устаноўлены новыя электрапліты, адрамантаваны ўваходныя групы, з’явіліся пандусы. Добраўпарадкавана прылеглая тэрыторыя: разбіты клумбы, выкладзена плітка на пешаходных дарожках, абноўлена і пашырана дзіцячая гульнявая пляцоўка. Цяпер мы рэальна адчулі, што грошы, якія мы плацім за пражыванне тут, выдаткаваны эфектыўна».

«Мы маем намер актывізаваць гэтыя працы, прыцягваць да іх і саміх жыхароў, многія з якіх зацікаўлены палепшыць свае ўмовы пражывання», – дадаў Андрэй Кіблоў.

БЕЛТА