Больш за мэтавікоў і больш за паўтысячы студэнтаў на бюджэт: як пройдзе ўступная кампанія ў МДУ ім. А.А.Куляшова

Рост папулярнасці мэтавай падрыхтоўкі, новая спецыяльнасць і амаль паўтысячы студэнтаў на бюджэт - у Магілёўскім дзяржаўным універсітэце ім. А. А. Куляшова расказалі пра асаблівасці сёлетняй уступнай кампаніі.

Як расказала адказны сакратар прыёмнай камісіі ВНУ Алена Башаркіна, сёлета набор абітурыентаў будзе ажыццяўляцца на 20 спецыяльнасцей. «У нас ёсць спецыяльнасці фізіка-матэматычнай адукацыі, у якіх ёсць розныя профілі. Спецыяльнасць адна, а прымаем абітурыентаў па прафілізацыях «матэматыка-інфарматыка», «фізіка-інфарматыка». Такі ж падыход датычыцца і «рамана-германскай філалогіі»: англійская мова, літаратура і нямецкая мова і англійская мова, літаратура і французская мова», - адзначыла яна.

У гэтым годзе ў магілёўскай ВНУ будзе праходзіць набор на новую спецыяльнасць. «Такая спецыяльнасць новая не толькі для нашага ўніверсітэта, але і ўсёй краіны – гэта «фізічная культура. Ваенна-патрыятычнае выхаванне». Гэты новы напрамак на выхадзе забяспечыць студэнтаў кваліфікацыяй «выкладчык. Кіраўнік ваенна-патрыятычнага выхавання», - распавяла Алена Башаркіна. - Таксама будзе ажыццяўляцца набор на спецыяльнасць «журналістыка».

Другі год запар будзе праводзіцца прыём абітурыентаў на спецыяльнасці «сацыяльна-педагагічную і псіхалагічную адукацыю», «сучасныя замежныя мовы» - гэта англійская і кітайская мовы. «Працягваецца набор на спецыяльнасць «спецыяльная і інклюзіўная адукацыя». У адрозненні ад астатніх спецыяльнасцяў, навучанне тут доўжыцца пяць гадоў, а на выхадзе выпускнік атрымлівае магістарскую ступень», - падкрэсліла яна.

Запатрабаванымі спецыяльнасцямі застаюцца «дашкольная адукацыя», «пачатковая адукацыя», «адукацыя ў галіне фізічнай культуры», «псіхалогія», «правазнаўства», «праграмная інжынерыя», «медыка-біялагічная справа».

Набор на дзённую бюджэтную форму навучання складзе 555 абітурыентаў. За аплату на дзённую форму прымуць 49 чалавек, на завочную форму на бюджэтнай аснове набяруць 200 чалавек, за аплату - 23. «Тэндэнцыя - да атрымання адукацыі за кошт сродкаў рэспубліканскага бюджэту з магчымасцю гарантаванага працаўладкавання пасля выпуску з ВНУ», - падкрэсліла адказны сакратар.

Расце ў ВНУ папулярнасць мэтавай падрыхтоўкі, прычым як з боку абітурыентаў, так і з боку заказчыкаў кадраў. «На дадзены момант па мэтавай падрыхтоўцы ў нас ёсць дадзеныя па не педагагічных спецыяльнасцях. «Так, на спецыяльнасць «сучасныя замежныя мовы» заказчыкі кадраў будуць заключаць дамовы з дзевяццю абітурыентамі, на «рамана-германскую філалогію» выдзелена сем месцаў для мэтавікоў, на «псіхалогію» - тры, «эканамічную інфарматыку» - адно, «журналістыку» - пяць. На «правазнаўства» выдзелена 30 месцаў для падрыхтоўкі мэтавікоў, на сённяшні дзень маецца 33 жадаючыя. На «эканамічнае права» выдзелена чатыры месцы для мэтавікоў, «праграмная інжынерыя» - адно месца, г.зн. па непедагагічных спецыяльнасцях для мэтавікоў у нас вызначана 60 месцаў. Звесткі па падрыхтоўцы мэтавікоў па педагагічных спецыяльнасцях стануць вядомыя пасля 1 чэрвеня», - прывяла дадзеныя Алена Башаркіна.

Расце цікавасць як у заказчыкаў кадраў, так і абітурыентаў да спецыяльнасці «правазнаўства». «У нас з'явіліся буйныя заказчыкі кадраў па гэтым напрамку. У іх ліку УСК па Магілёўскай вобласці - яны гатовы заключыць дагаворы з 25 абітурыентамі. Пракуратура Магілёўскай вобласці будзе навучаць у нас пяць сваіх мэтавікоў, - адзначыла адказны сакратар. - На «эканамічнае права» чатыры месцы выдзелены для падрыхтоўкі мэтавікоў ад Магілёўскай мытні».

Сумесная работа ВНУ і патэнцыйных работадаўцаў дае свой плён - маладыя людзі ахвотна паступаюць у ВНУ на ўмовах мэтавай падрыхтоўкі: сацыяльныя гарантыі, 100 працэнтаў наяўнасць першага рабочага месца, разнастайная дапамога і падтрымка з боку калектываў, - усе ўмовы для маладых спецыялістаў ёсць.

Прэферэнцыі пры паступленні будуць мець выпускнікі педагагічных, спартыўна-педагагічных і інжынерных класаў. Паступленне ў такіх абітурыентаў будзе па выніках сумоўя. Выпускнікі педагагічных спартыўна-педагагічных класаў могуць паступаць на педагагічныя спецыяльнасці, інжынерных класаў - на спецыяльнасці фізіка-матэматычнага профілю.

БЕЛТА