Будаўніцтва новага корпуса райбальніцы ў Асіповічах завершаць у другой палове 2019 года

Увод у эксплуатацыю новага лячэбнага корпуса цэнтральнай раённай бальніцы горада Асіповічы запланаваны ў другой палове 2019 года. Пра гэта паведаміў сёння журналістам пасля наведвання аб’екта, які будуецца, намеснік прэм’ер-міністра Ігар Петрышэнка.

«Корпус будуецца пад патрэбы Асіповічаў і суседніх раёнаў, – адзначыў віцэ-прэм’ер. – Гэта будзе буйны медыцынскі комплекс, які аснасцяць самым сучасным дыягнастычным і хірургічным абсталяваннем. Тут размесцяцца прыёмнае аддзяленне, аддзяленні хірургіі і анестэзіялогіі, акушэрска-гінекалагічнае, аперацыйны блок і іншыя, гэта значыць тое, што сёння найбольш актуальна для раёна».

Паводле слоў Ігара Петрышэнкі, фінансаванне на завяршэнне будаўніцтва выдзелена ў дастатковым аб’ёме. Кіраўніцтва генпадрадчыка будоўлі («Магілёўаблсельбуд») запэўніла, што ўсе працы будуць завершаны згодна з графікам. Ужо пачалася закупка медыцынскага абсталявання.

«Умовы працы ў існуючай бальніцы, вядома, сцесненыя, але з асноўнымі задачамі па аказанні кваліфікаванай медыцынскай дапамогі тут спраўляюцца, – падкрэсліў Ігар Петрышэнка. – Упэўнены, што з уводам у эксплуатацыю новага аб’екта аказанне меддапамогі ў раёне будзе паднята на якасна новы ўзровень. Аналагічныя параметры перадавога абслугоўвання будзем імкнуцца забяспечваць і ў іншых рэгіёнах краіны».

Як паведаміў галоўны ўрач райбальніцы Павел Шаціла, будаўнічыя работы ў лячэбным корпусе выйшлі на фінішную прамую – будаўнікі цалкам закрылі перыметр будынка, падключылі інжынерныя сеткі, цяпер вядзецца ўнутранае аздабленне памяшканняў. Новы корпус злучыць з існуючым будынкам бальніцы пешаходная галерэя. «Дзякуючы ўводу ў эксплуатацыю новага аб’екта будуць створаны ўсе неабходныя ўмовы для работы медперсаналу і якаснага абслугоўвання насельніцтва, – сказаў галоўны ўрач. – Высокатэхналагічная медыцынская дапамога будзе аказвацца і жыхарам найбліжэйшых раёнаў, у тым ліку Мінскай вобласці».

БЕЛТА