Цэх па вытворчасці сухіх кармоў адкрылі на базе сельгаспрадпрыемства Магілёўскага раёна

Цэх па вытворчасці сухіх кармоў адкрылі ў Магілёўскім раёне. Пра гэта паведаміла намеснік старшыні Магілёўскага райвыканкама Ірына Чындо.

Цэх уведзены ў эксплуатацыю СДП «Авангард» Магілёўскага аддзялення Беларускай чыгункі. Аб'ект рэалізаваны на базе сельгаспрадпрыемства другой чаргой інвестпраекта па будаўніцтве свінакомплексу магутнасцю 24 тыс. галоў за год. Вытворчая магутнасць цэха складае каля 20,2 тыс. т канцэнтраваных кармоў рознага прызначэння за год. Устаноўленае там абсталяванне дазваляе вырабляць усе віды камбікармоў для буйной рагатай жывёлы, свіней, птушкі.

Цэх аснашчаны лініямі макра- і мікрадазіравання, напылення алею і патакі, перапрацоўкі алею насення рапсу халоднага адціску магутнасцю да 1 тыс. т за год. Для захоўвання збожжа і наступнай яго перапрацоўкі абсталяваны 4 сіласы захоўвання збожжа змяшчальнасцю 2 тыс. т кожны. Сіласы абсталяваны шнэкамі для зачысткі збожжа, вентылятарамі для прадзімання, патрубкамі з выпускнымі засаўкамі, па якіх збожжа трапляе ў канвеер.

Ёсць таксама свая лабараторыя для правядзення ўсіх відаў аналізаў і даследаванняў, неабходных пры вытворчасці камбікармоў. Тут будуць рабіць аналізы якасці ўваходнага кантролю сыравіны, аналізы для выдачы пасведчанняў якасці выпускаемай прадукцыі. У працэсе вытворчасці тэхнолаг і лабарант кантралююць кожную партыю гэтага асартыменту або віду выпускаемай прадукцыі, даюць заключэнне аб далейшым выкарыстанні камбікорму.

Штатная колькасць вытворчага ўчастка складае 23 працоўныя месцы, у тым ліку інжынер-механік, тэхнолаг, лабаранты, апаратчыкі. На будаўніцтва цэха затрачана Br23,5 млн, у тым ліку на закупку тэхналагічнага абсталявання – Br10 млн. На рэалізацыю праекта вылучаны сродкі інвестыцыйнага фонду Мінтранса ў суме Br16,1 млн.

«У цэлым па Магілёўскім раёне за 5 месяцаў бягучага года забяспечана прыцягненне інвестыцый у асноўны капітал у суме Br160,6 млн, што ў супастаўных цэнах на 25,3% больш, чым за аналагічны перыяд 2021 года, – адзначыла Ірына Чындо. – Рост інвестыцый забяспечаны за кошт павелічэння затрат на будаўніча-мантажныя работы (уключаючы работы па мантажы абсталявання) на 40,6%, а таксама набыццё машын, абсталявання і транспартных сродкаў – на 20,4%».

На жыллёвае будаўніцтва выкарыстана Br42,2 млн. інвестыцый (26,3% да іх агульнага аб'ёму). У супастаўных цэнах гэта ў 1,6 раза больш, чым у студзені – маі 2021 года. Уведзена ў эксплуатацыю 24,1 тыс. кв. м агульнай плошчы жылля, што складае 83,1% да задання на I паўгоддзе 2022 года і на 46,8% больш, чым у студзені – маі мінулага года. Жыллё пабудавана індывідуальнымі забудоўшчыкамі.

Значна ўзраслі інвестыцыі ў ТАА «БелЭмса» і РУП «Магілёўаўтадар». Адной з асноўных крыніц фінансавання інвестыцый у асноўны капітал у студзені – сакавіку гэтага года сталі ўласныя сродкі арганізацый – 38,4% агульнага аб'ёму інвестыцый, заключыла намеснік старшыні райвыканкама.

БЕЛТА