Рус Бел Eng 中文

Цэнтр перапрацоўкі і вытворчасці мясцовай сельгаспрадукцыі створаць у Слаўгарадскім раёне

ЕС падтрымае 6 мясцовых ініцыятыў на 30 тыс. еўра ў Магілёўскай вобласці. Такі вынік кірмашу «Мясцовыя ініцыятывы для мікрарэгіёнаў развіцця», які прайшоў у Слаўгарадзе ў рамках праекта «Сеткавае ўзаемадзеянне для паляпшэння магчымасцей занятасці ў сельскіх раёнах Магілёўскай вобласці». Пра гэта паведаміў дырэктар Міжнароднага фонду развіцця сельскіх тэрыторый Сяргей Тарасюк.

На кірмашы былі прадстаўлены мікрарэгіёны развіцця Слаўгарадскага, Быхаўскага, Клічаўскага, Краснапольскага і Чэрыкаўскага раёнаў, якія прэзентавалі 28 розных ініцыятыў. Лепшыя па выніках конкурсу атрымаюць грантавую падтрымку.

У ліку найбольш перспектыўных ініцыятыў – стварэнне ў Слаўгарадскім раёне цэнтра перапрацоўкі і вытворчасці мясцовай сельгаспрадукцыі. За рэалізацыю гэтага праекта ўзяўся мясцовы кааператыў «Хварасцянскі». Цэх перапрацоўкі будзе створаны ў вёсцы Хварасцяны на вытворчай базе фермерскай гаспадаркі «Хварасцяны-агра», якая ўжо мае паспяховы вопыт работы па праектнай дзейнасці з удзелам і падтрымкай знешніх донараў. Напрыклад, на базе былой школы ў мінулым радыёвядучы, а цяпер кіраўнік КФГ Канстанцін Дзянісаў 

стварыў вытворчасць грыбоў (вешанак) на саломе. Для аўтаматызацыі вытворчасці тут устанаўліваюць абсталяванне, паралельна будуць ствараць цэх па перапрацоўцы сельгаспрадукцыі.

«Галоўная ідэя нашай ініцыятывы ў тым, каб стварыць дадатковыя працоўныя месцы і арганізаваць выпуск новай канкурэнтаздольнай кансерваванай прадукцыі. Мы маем намер актыўна прыцягваць да яе вытворчасці мясцовае насельніцтва. На першым этапе, акрамя марынаваных грыбоў, плануем арганізаваць выпуск марынаванай морквы па-карэйску (моркву будзем закупляць у тым ліку ў жыхароў Слаўгарадскага раёна), а затым пашырым асартыментны пералік. У планах выпуск квашанай капусты, марынаванага часнаку, цыбулі, зялёнага гарошку – усё пад маркай «Хварасцянскі прадукт». Спачатку пачнём фасаваць прадукцыю ў харчовую пластыкавую тару, але да канца бягучага года плануем ўстанавіць лінію па яе ўпакоўцы ў шкляны слоік», – падзяліўся амбіцыйнымі планамі Канстанцін Дзянісаў.

Старшыня Пастаяннай камісіі Палаты прадстаўнікоў Нацыянальнага сходу па пытаннях экалогіі, прыродакарыстання і чарнобыльскай катастрофы Таццяна Кананчук падзякавала ўсім удзельнікам за падрыхтоўку ініцыятыў. На яе думку, усе падышлі да распрацоўкі праектаў вельмі адказна і пастараліся раскрыць патэнцыял і ўнікальнасць свайго раёна, сельскага населенага пункта. «Хоць па выніках конкурсу падтрыманы толькі шэсць ініцыятыў, гэта не значыць, што астатнія не павінны быць рэалізаваныя. Яны ўсе вартыя ўвасаблення ў жыццё. І гэта магчыма зрабіць з дапамогай іншых знешніх донараў і розных праграм падтрымкі. Гэта будзе садзейнічаць занятасці і самазанятасці мясцовага насельніцтва, стварэнню новых рабочых месц у вёсцы, устойліваму развіццю тэрыторый, што з'яўляецца асноўнай мэтай нашага праекта», – падкрэсліла парламентарый.

Падчас кірмашу адбылася прэзентацыя праекта «Сеткавае ўзаемадзеянне для паляпшэння магчымасцей занятасці ў сельскіх раёнах Магілёўскай вобласці», які фінансуецца ЕС, была арганізавана работа тэматычных круглых сталоў.

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая