Чатыры жыцці выратавана ў Магілёве дзякуючы аўтаномнаму пажарнаму апавяшчальніку

Чацвёра выратаваных, у тым ліку аднагадовае дзіця, – такія вынікі спрацоўкі аўтаномнага пажарнага апавяшчальніка. Пра гэта паведаміла старшы інспектар абласнога ўпраўлення МНС Вольга Нехарошых.

19 лютага каля 6 гадзін раніцы сям’ю, якая жыве ў прыватным жылым доме па вул. Вясновай у Магілёве, разбудзіў гучны гук аўтаномнага пажарнага апавяшчальніка: дом быў напоўнены дымам. 45-

гадовы гаспадар, яго 24-гадовы сын разам з жонкай і малым паспяшаліся эвакуявацца. Ніхто не пацярпеў.

А вось хаце дасталося: пашкоджаны дах, перакрыцце і маёмасць. Прычына пажару ўстанаўліваецца.

Страшна ўявіць, якія маглі б быць наступствы пажару, калі б жыхары дома ў 2019 годзе не ўстанавілі аўтаномныя пажарныя апавяшчальнікі.

У мінулым годзе ў Магілёўскай вобласці на рахунку гэтага кампактнага прыбора 14 выратаваных, у тым ліку 3 дзяцей.

«Не адкладаючы на заўтра, устанавіце АПА ў кожным жылым пакоі свайго дома, а таксама ў жыллі родных і блізкіх Вам людзей. Бяспека ў першую чаргу залежыць ад нас саміх!» – падкрэсліла Вольга Нехарошых.